Anak gidunggab sa amahan

CEBU, Philippines — Gidunggab sa amahan ang iyang anak nga lalaki sa Sitio Lupot, Barangay Sabang, Dakbayan sa Danao niadtong Domingo sa kaadlawon.

Ang biktima giila nga si Raymund Porlas Aguilar, 20, molupyo sa maong lugar, samtang ang iyang amahan giila nga si Leo Aguilar, 60-anyos ug usa ka panday.

Matud pa sa imbestigasyon nga si Raymund gidunggab sa iyang amahan gamit ang 10 pulgadas nga kutsilyo dihang naabot siya sa ilang panimalay ug padulong na sulod sa iyang kwarto gikan nga nagduwa og basketball.

Siya nakaangkon og samad sa walang bahin sa iyang dughan ug dali siyang gidala sa Cebu Provincial Hospital sa Danao apan gibalhin sa usa ka hospital sa Dakbayan sa Sugbo.

Wala pa nasayri ang rason sa pagpanunggab sa iyang amahan apan kini boluntaryong nitahan sa iyang kaugalingon dala ang kutsilyo nga gigamit sa pagdunggab sa iyang anak sa Danao City Police Station ug naghuwat sa tukmang kaso nga ipasaka batok kaniya. - Kathleen Kaye G. Gonzaga, CNU Intern (BANAT NEWS)