EDITORYAL - Kampanya via social media

Ang Comelec miangkon nga kuwang kaayo ang ilang mga sakop aron bantayan ang mga online campaigning sa mga mokandidato sa barangay ug Sangguniang Kabataan elections, bisan og wala pa ang gitakdang adlaw sa pangampanya. Ang online campaigning mao ang pangampanya pinaagi sa mga social media, sama sa Facebook, Twitter, Instagram ug uban pa.

Bag-o kining teknolohiya nga nagamit sa mga kandidato sa nakalabay nga eleksiyon, ug gani giingong dako kaayo kini og natabang sa mga kandidato nga nakadaog ug nakalingkod karon.

Ang mga dagkong kandidato sa mga nasudnong posisyon mikuha gyud sa serbisyo sa mga bloggers ug mga netizens nga 24-oras nga nagtutok sa social media aron sila ikampanya, ug daoton ang ilang mga kontra pinaagi gihapon sa social media. Karon, dili man tuod dagko og pundo kining mga mokandidato sa barangay elections apan wala kini magpasabot nga dili na sila angay mogamit sa social media. Pabor kaayo kini niadtong mga kandidato nga wala pa makaduso og certificate of candidacy sa Comelec kay dili pa man matawag nga early campaigning ang ilang gihimo.

Apan kadtong mga nag-unauna sa pag-file sa ilang COCs, kinahanglang magpaabot sila sa pagsugod na sa kampanya unya sa Mayo 4 hangtud Mayo 12, aron dili sila makasohan sa paglapas sa balaod. Makadaginot ang mga kandidato sa ilang campaign ads kon mogamit og social media kay libre kining mokatap ngadto sa mga netizens, bisan gani ang ilang mga kontra mahimong makadawat ug makabasa niini. Busa kadtong mga naka-file na og COCs, ayaw lang gyud mo kasayop nga mangampanya kamo sa wala pa ang Mayo 4. Mosamot gyud ang inyong problema kon makadaog kamo sa election, unya ma-dismiss lang tungod sa early campaigning. Hinoon, maayo usab unta kini kay makita man dayon sa katawhan kon kinsa sa mga kandidato sa ilang barangay ang mga badlongon ug dili angay’ng botohan.