Naglabas og isda nadasmagan patay

CEBU, Philippines — Nakalas ang usa ka lab-asera og isda human kini nadasmagan sa usa ka Hi-Ace van sa may Linao-Lipata, Minglanilla kagahapon sa alas 6:30 sa buntag. Ang nakalas naila nga si Cresenciana Repollo, 72, minyo, taga Barangay Tuyan, Dakbayan sa Naga, samtang ang nakadasmag mao si Gregorio Aton, 56, taga Tindog, Medellin.

Matud ni Senior Police Officer 2 Oliver Dacua, desk officer sa Minglanilla Police Station, nga aksidenteng nadasmagan si Repollo nga nagbitbit sa iyang mga tinda nga isda nga sulod sa balde.

Dihang nadasmagan si Repollo, maayong pagkabunal sa dalan  hinungdan nga dali kini nga gidala sa tambalanan ug sulod sa pipila ka oras nakutloan kini  sa iyang kinabuhi.

Kasamtangang gitanggong si Aton samtang nagpaabot pa sila sa pagpasaka og tukmang kaso sa pamilya sa namatay. (Jomelyn B. Largado, CNU Intern/GMR)(BANATNEWS)