Flyover ni Del Mar

Ako ra ang mag-drive sa akong sakyanan mao nga nasuheto gyud kaayo ko sa trapiko og nasabtan nako ang sitwasyon diha sa kadalanan.

Nakahunahuna ko pagsuwat niini nga pasalamatan nako si Kongresista Raul V. Del Mar tungod sa proyekto niya pagtukod og mga flyover, ilabi na diha sa karsada paingon sa Banilad.

Dili malalis nga grabe gyud ang traffic gikan pa sa Gorordo Avenue, liko sa Archbishop Reyes Avenue, ug ngadto na sa Gobernador Mariano Cuenco Avenue lahos na sa Talamban.

Samtang nag-drive ko sa akong sakyanan nga nabara sa grabeng traffic, nakaingon ko nga pastilan, kon wala pa ang flyover, paminaw ko pwerte gyud nga pagka problema.

Karon gani nga diretso ra ang dagan sa sakyanan kay dili na man kinahanglang mohunong pa sa eskina Escario; didto sa Salinas Drive, ug didto sa Banilad, problema pa man gani, unsa pa kaha kon walay flyover?

Tungod niini, pahimuslan nako ang pagpasalamat ni Del Mar. Samtang ang gipatukod niya nga flyover wala tuod kini hingpit gyud nga nakasulbad sa problema sa trapiko, apan nakatabang.

Dako gyud kaayo og tabang ang pagtukod og flyover nga gibabagan ni kanhi mayor Mike Rama kay kuno makapabati sa talan-awon. Usbon nako, salamat Congressman Del Mar.

* * *

Siyaro og dili maleksyon kadtong tag-iya og kotse nga migara-gara sa pagpusil sa clamp sa CITOM nga gi-clamp sa iyang ligid. Makasabot ko sa iyang gibati nga nasuko dihang gi-clamp sa mga traffic enforcers ang ligid sa iyang sakyanan.

Apan unsaon man nga nakasala man siya kay nagpataka ra man siya pag-parking sa iyang kotse? Usa ka higayon bitaw, gi-clamp man sa CITOM ang akong sakyanan.

Aw, wala ko’y nahimo gawas sa pagbayad sa multa. Maayo man gani kay P500 ra niadtong higayona. Giparking man gud nako ang akong awto atubangan sa Chong Hua Hospital kay nagdalidali ko sa pagpa-admit sa akong bata niadtong higayona, usa ka gabii.

Sus, nakalimtan man nako sa pagbalik ug nabuntagan. Pag-adto nako, sus may clamp na. Aw, sirit sa CITOM ug gibayran ang multahan kay nakalapas man sa ordinansa.

Kadtong maong tawo nga nagpagaragara og gipusil ang puthaw nga clamp, naleksyon karon kay ipatanggong man gyud sa mayor ang kotse niya, bag-o pa ra ba. Dili kini ipa-release hangtud nga mahuman na ang kaso kay ipakiha man gyud sa mayor.

Busa, kamong mga tag-iya og sakyanan nga ma-clamp, agwantaha ang pagbayad, ayaw gub-a ang clamp kay madoble ang inyong problema. Unya, wala na’y hangyo sa multahan, basta maglambigit og clamping.