Wa hatagi’g sinsiyo naghikog

CEBU, Philippines - Patay ang 41-anyos nga lalaki kinsa naghikog gamit ang extension cord sa kuryente sulod sa ila’ng panimalay sa sitio Kulo, Canjulao, dakbayan sa Lapu-Lapu sa niagi’ng gabii.

Matud ni PO2 Joseeh Cutanda sa Lapu-Lapu City Police Office –Homicide Section nga wala hatagi og sinsiyo si Rando Villeno sa iya’ng asawa nga si Fatima hinungdan nga nagpakamatay.

Gikan nagduwa og baraha si Villeno ug nangayo og kwarta apan nagdumili paghatag ang asawa og sinsiyo.

Samtang nalandig sa tambalanan ang usa ka ginang human nagdunggab sa kaugalingon sa dalan Sanciangko, Pahina Central, dakbayan sa Sugbo pasado alas 4:45 kagahapon sa buntag.

Ang ginang naila nga si Loleta Lihay-lihay, 49, buwag sa bana ug nagpuyo sa maong lugar apan lumad nga taga Masbate.

Matud ni PO1 John Erick Samosa sa homicide section sa Cebu City Police Office nga nakita na lang sa anak nga nagtaop na ang kutsilyo sa tiyan sa iya’ng inahan ug nagkadugo ug dali’ng gidala sa Cebu City Medical Center. (Christell Fatima M. Tudtud ug Jojo C. Ugdol/GMR)

Davide daghan nakat-onan sa Japan

Daghan nakat-onan si Gob. Hilario Davide III sa iya’ng pagtambong sa 3rd UN Conference kabahin sa disaster risk reduction sa Sendai, Japan.

Matud niya nga ang iyang nakat-onan ipaambit niya sa uban ug i-apply sa probinsiya.

Usa sa gikinahanglan sa pagpangandam sa katalagman sumala sa gobernador ang disiplina ug pagpanginlabot sa tanan ug dili lang ang mga opisyal sa gobiyerno ang may obligasyon apan lakip ang katawhan.

Dugang ni Davide nga kung ang komunidad wala’y pakabana lisud ipatuman ang mga palisiya sa pagpangandam kung may moabot nga katalagman. (BANAT NEWS)