San Miguel lusot sa Rain or Shine

MANILA, Philippines — Hindi naging madali subalit nakaiskor pa rin ng dikidkang 101-98 panalo ang reigning champion San Miguel kontra sa Rain or Shine sa Game One ng PBA Philippine Cup semifinals kahapon sa Mall of Asia Arena.

Bigo ang Beermen na maipagpag ang Elasto Painters sa buong laro bago bahagyang makaalagwa sa kalagitnaan ng fourth quarter tungo sa 1-0 lead sa best-of-seven series.

Kayod-marino si se­ven-time PBA MVP June Mar Fajardo na humakot ng 23 points, 11 rebounds, 5 assists, 1 steal at 3 blocks.

Umalalay sa kanya sina Don Trollano, Marcio Lassiter at CJ Perez na may 17, 16 at 13 points, ayon sa pagkakasunod, para sa SMB na susubok makapagpondo ng higanteng 2-0 bentahe bukas.

May apat na tres si Lassiter, habang sina Trollano at Perez ang tru­mangko sa ratsada ng Beermen sa fourth quarter.

Tampok dito ang anim na sunod na puntos ni Perez para mabigyan ng 99-91 kalamangan ang SMB sa huling tatlong minuto.

“We just have to minimize our turnovers and take care of the ball because if we don’t take care of the ball this is what’s gonna happen. They’re gonna have easy shots and we won’t be able to sprint back down on defense,” ani coach Jorge Gallent matapos ang muntikang comeback ng ROS.

Sampung puntos lang ang pinakamalaking abante ng Beermen at ha­los komportable na sa unahan, 99-91, bago magpakawala ng 7-2 balikwas ang Elasto Painters.

Nakalapit ang ROS sa 98-101 sa huling 31 segundo matapos ang free throws ni Andrei Caracut, na may tsansa pa sanang makapuwersa ng overtime subalit sablay ang panablang tres.