Unfair sab uy

Ang mga water supplier sa Metro Cebu Water District (MCWD) angay na gyud karon nga mangita og paagi kon unsaon nila nga bisan og moigo na ang El Niño, ang grabeng huwaw, makapadayon sila pagsuplay og tubig sa MCWD aron magamit usab sa katawhan.

Ang JE Hydro & Bio-Energy Corporation maoy major supplier og tubig sa MCWD nga nagkuha og tubig gikan sa tin-aw nga sapa sa Barangay Lusaran, Cebu City ug ilang gi-process aron mahimo kining mainom.

Gikontak nako ang chairman sa JE Hydro nga si Engr. Joffrey Hapitan kon unsay ilang pagpangandam, kay sila gyud maoy gisaligan kay pagka karon nagsuplay sila og 20,000 cubic meters (2 million ka litro/100,000 ka baril nga tubig) ngadto sa MCWD kada adlaw.

Giingnan ko ni Engr. Hapitan nga nagsugod na unta sila paghimo’g mga projects aron nga maalkontrahan nila ang grabeng huwaw pinaagi sa paghimo og dugang pundohanan sa tubig, apan kuwang ang ilang pundo nga salapi kay wa man diay dayon makabayad ang MCWD sa ilang obligasyon.

Namati ko ni Engr. Hapitan, bisan og bugnaw kaayo kini og sinultihan nga daw wa ra masuko, apan nasabot nako ang problema nga iyang gihambin kay gusto gyud unta siya nga motabang apan unsaon nga kuwang ang iyang pundo nga salapi.

Nangutana ko sa mga sakop ni Engr. Hapitan ug gitug-anan ko nga kapin sa P100 million ang kolektahonon sa JE Hydro gikan sa MCWD nga wa pa gyud mabayari. Nakapangutana ko sa akong hunahuna kon ngano nga naingon man niini?

Nganong wa man dayon makabayad ang MCWD sa obligasyon nila sa JE Hydro, ug basin sab tingali mao sab kini ang sitwasyon sa ubang water supplier, nga wa dayon bayari sa ilang kolektahonon.

Naglibog ko nganong dili man dayon makabayad ang MCWD sa ilang bayronon ngadto sa mga water supplier, ilabi na sa JE Hydro, nga ang ilang policy putol man dayon sa koneksyon sa mga konsumedor kon dili makabayad lapas sa usa ka buwan?

Mga amigo nako ang kadagkoan sa MCWD, ilabi na nga gikan sa media ang ilang general manager, ug nakaila sab gyud ko ni Atty. Ruben Almendras. Pulos sila mga maayong tawo ug tingali makasabot sila nga angay’ng bayaran dayon nila ang ilang obligasyon.

Tabla na man gud nga ang tubig nga nasuplay sa JE Hydro nabayran na sab sa mga konsumedor, unya nganong dugay man nila nga nabayaran? Nahinumdom hinoon ko sa mga kumprador og baboy sa Barili ug ubang lungsod, nga utangon ang imong mga baboy, ibaligya nila, pero bisan og nahurot na’g kahalin, dili gihapon nila bayaran ang tag-iya.