Ang mga hikog

Gidapit ko sa usa sa akong mga idolo nga si Padre Brandit Bohol aron mohimo og deliverance ingon man pagpasabot kalabot ning hikog. Nagsunod sunod man gud intawon ang maong mga panghitabo sa usa sa mga dapit nga sakop sa iyang parokya.

Among giduaw ang maong dapit ug sulod sa Santos nga Misa among gihimo ang pagpasabot. Dili ikalimod nga daghan kanato karon ang puno kaayo sa mga kabalaka ingon man problema.

Daghan usab kanato ang nibati og tumang guilt gumikan sa atong mga sala. Ang hikog kun buot hunahunaon susama sa hysteria.

Nga kun kini masugdan nag ani, adunay dakong purohan nga magsunod ang hitabo sa hikog.

Kini tungod kay sa bisan unsang hinungdan daghang mga tawo ang nagtinguha nga hunoson ang ilang kinabuhi gumikan sa gipas-an nilang suliran o dili ba kaha gumikan sa mga hormonal imbalance ug balatian. Kun ang usa ka tawo ang adunay kaisog nga mohimo sa paghikog kadtong naghunahuna pa lamang ang mosunod dayon.

Ngano? Tungod kay ma affirm ang iyang tinguha. Nga sa ato pa, maka relate siya ug mao kini makahatag kaniya og kaisog ug motivation sa paghimo sa ingon.

Dili kini mahitungod sa paghunos sa kinabuhi kondili mahitungod kin isa paglingkawas gikan sa mga suliran sa kinabuhi.

Labina kun wala gyuy maminaw sa mga yangongo sa hingtungdan. Pun-an pa nga ang hunahuna sa matag usa nahimong puno sa mga negatibong mga butang nga maghatag og mga negatibong pagbati sa hingtungdan.

Ning panahona karon mahinungdanon kaayo kining mosunod:

1. Pag-Ampo aron malig-on sa panalipod nga Diosnon.

2.  Pagdasig sa kaugalingon ug sa uban.

3. Pagpaminaw ug pag-unong labina kanila nga huyang ug maglisud og antos sa mga butang mangil-ad ug delikado.

4.  pagtinabangay sa panahon sa panginahanglan. Atong hinumdoman nga mas Labaw ug madaugon ang Ginoo kaysa atong mga suliran.