UC Webmasters milatigo sa Jaguars, 3-0 na

CEBU, Philippines — Ang University of Cebu (UC) Webmasters mitumba sa University of San Jose-Recoletos (USJ-R) Jaguars, 71-63, aron pagpabiling way pildi sa tulo sa sinugdanan sa Cebu Schools Athletic Foundation, Inc. (CESAFI) Season 26 basketball tournament niadtong Sabado, Septiyembre 12, sa Cebu Coliseum.

Si Ricofer Sordilla mikadlit og 16 puntos, duha ka rebounds ug pito ka assists samtang si Maverick Eligoyo mipupo og 14 puntos, unom ka rebounds, duha ka assists ug duha ka steals sa dihang ang Webmasters miasumir sa solong liderato sa college division uban ang perpektong 3-0 rekord.

Ang Webmasters alkansi og usa ka lugas, 35-36, sa halftime apan gibali ang huyop sa hangin pabor kanila sa second half diin sila miabante og 15 puntos.

Si Kirst Ryll Da Silva miharos og 22 puntos, lima ka rebounds, upat ka assists ug duha ka steals samtang si El John Lacaya mikimada og 15 puntos, pito ka rebounds, duha ka assists ug usa ka steal alang sa Jaguars, nga naparot sa ikaduhang sunod-sunod nga higayon.

Sa laing collegiate matchup, ang UCLM mihatag ni coach Dondon Hontiveros sa una niining daog human nila gibihag ang Cebu Institute of Technology-University (CIT-U) Wildcats, 64-58.

Si Dan Mitchell Ferraren miposte og 11 puntos, duha ka rebounds ug duha ka assists samtang si Cyrus Ubayubay midugang og 10 puntos, unom ka rebounds ug duha ka assists aron tabangan ang UCLM pagkulit sa una nilang daog.

Si Marty Louisse Sotto aduna say 10 puntos uban ang duha ka assists ug duha ka steals lang sa UCLM, nga wala na molingi pa human misutoy sa sayong 23-10 nga labaw aron pagkangon ang duha ka sagunson nilang pildi.

Ang UCLM misira sa first half bitbit ang 41-26 nga bentaha, nga ila pang gipaburot sa 20 puntos.

Si Braebon Ali Thompson mireshistro og double-double nga 20 puntos ug 14 ka rebounds uban ang tulo ka rebounds apan wala mosaler ang nindot niyang salida kay anv Wildcats napildi sa unang higayon sa tulo ka duwa.

Sa aksiyon sa high school, ang Sacred Heart School-Ateneo de Cebu (SHS-AdC) Magis Eagles miabli sa ilang kampanya alang sa makasaysayanong six-peat uban ang 61-56 nga pagpakaging sa University of the Visayas (UV) Baby Lancers.

Si Jibson Gaviola Tan maoy nangu sa Magis Eagles uban ang 14 puntos ug pito ka rebounds.

Si Franklin Kenneth Basa midonar og 11 puntos, lima ka rebounds, tulo ka assists ug tulo ka steals samtang sila si Jacob Gabriel Javelosa ug Hionrey Recio mitampo og 10 puntos matag usa alang sa Magis Eagles.

Sa laing resulta, si Klent Ovillo mipabuto og 22 puntos uban ang lima ka rebounds, usa ka assist ug duha ka steals samtang si Carl Torreon mitimbre og 15 puntos, duha ka assists ug tulo ka steals sa dihang ang UCLM juniors milampornas sa Benedicto College (BC) Baby Cheetahs, 69-43, alang sa ikaduha nilang sagunson nga daog.