Lalaki gipusdaka’g bato patay

CEBU, Philippines - Usa ka lalaki ang napalgang patay nga gituohang gipusdakan og bato sa ulo diha sa ibabaw nga bahin sa SRP Tunnel kagahapon sa buntag.

Ang biktima naila lang sa pangalan nga “Willy” base sa pamahayag sa bag-o pa niini nakapuyo diha sa maong dapit.

Matud pa ni Police Officer 3 Jerry Genelaso sakop sa Homicide Section sa Cebu City Police Office nga nahinabi sa Banat News   posibleng kaadlawon gipatay ang biktima.

Usa ka lalaki ang paingon unta maligo maoy nakakita sa lawas sa biktima kagahapon sa buntag ug dali kini nga mi-report sa kapulisan.

Sa crime scene nakita sa mga polis ang dako nga bato nga gituohang maoy gipusdak sa ulo sa biktima nga nakaingon sa iyang kamatayon.

Nagtuo si Genelaso nga adunay nasuko sa biktima ug gibawsan kini human gikatahong duna kini gibastos sa maong dapit.

Ang kapolisan padayon pa sa ilang imbestigasyon kung kinsa ang responsable sa krimen. (BANAT NEWS)