Gi-rekrut padung sa Russia, na-intercept sa MCIA

CEBU, Philippines — Bisan pa sa mga balita nga duna nay nangamatay nga mga Filipino sa gubat sa Ukraine, duna pa gihapoy pipila nga nabiktima ug nailad tungod sa panginahanglan nilang makatrabaho sa abroad.

Ning bulana lang, usa ka 50-anyos nga lalaki ang na-intercept diha sa Mactan-Cebu International Airport (MCIA) samtang kini padung unta molarga sa nasud sa Vietnam isip usa ka turista.

Apan sa dihang giimbestigar na siya sa mga otoridad, niangkon kini nga nadawat siya aron motrabaho isip K9 handler didto sa nasud sa Russia nga dunay sweldong $3,500 kada bulan.

Giangkon sad niya nga ang nag-recruit kaniya nga agency, nimando sa iyaha nga taguon ang iyang tinuoray nga destinasyon.

Dili lang siya unang nabiktima sa mga recruiter gikan sa Russia, niadtong niaging bulan, upat ka mga lalaking Filipino sad ang gi-intercept sa mga immigration officers sa Ninoy Aquino International Airport Terminal 1 tungod kay matud pa illegal silang gi-recruit isip security ug trabaho sa military sa Russia.

Nagulhos-ulhos ang pagkasikop sa upat sugod Septembre 18,19,ug 22. Matud pa sa BI, wala magkatakdo-takdo ang ilang mga pamahayag nga gihatag maong gipugngan sila sa paglarga.

Ang tulo padung unta sa Thailand apan sa pagsukit-sukit sa ila niangkon silang padung sila sa Russia ug naa silay sweldo nga P70,000 kada bulan.

Samtang ang ikaupat, padung sa Thailand apan niangkon gihapon nga padung siya sa Russia para mosulod sa militar didto nga ang recruiter maoy nigastos sa tanan sa iyang biyahe.

Sa nangaging mga bulan, dunay mga Pilipino nga nangadakpan didto sa panggubatan sa Ukraine, ug duna say namatay.  Ang Department of Foreign Affairs nipasidaan nga ang mga ingon ani nga salaod posibleng moresulta sa pagkawalag sa citizenship.