Analog TV babu na ngayong Nobyembre!

MANILA, Philippines — Isang makasaysayang yugto sa telebisyon sa Pilipinas ang papalapit na sa katapusan ngayong Nobyembre, habang sinisimulan ng mga network sa bansa ang unti-unting pagwawakas ng serbis­yong analog TV upang bigyang-daan ang Digital Terrestrial Television Broadcast (DTTB).

Ang mahalagang hakbang na ito—ang pagwawakas ng analog broadcast o Analog Switch Off (ASO)—para sa Mega Manila ay magaganap ngayong Nobyembre 2026, matapos ang mahigit 70 taon ng pagsasahimpapawid ng telebisyon sa Pilipinas. Ito ay hudyat ng isang makabuluhang transisyong teknolohikal sa kasaysayan ng pagbo-broadcast sa bansa.

Sa loob ng ilang henerasyon, ang analog television ay higit pa sa isang teknolohiya para sa mga pamilyang Pilipino. Ito ang nagsilbing bintana kung saan nila nasaksihan ang mga makasaysayang pangyayari, balita, palakasan, mga usaping pampubliko, libangan, pelikula, at iba pang mga programang naging bahagi na ng kanilang pang-araw-araw na buhay. Ang pamilyar na analog signal ay magpapaalam na ngayon upang magbigay-daan sa digital na panahon.

Ang paglipat mula sa Analog TV patungong DTTB ay magdadala ng bagong yugto ng free-to-air na pagbo-broadcast, na nag-aalok ng mas malinaw na mga imahe, mas mahusay na reception, mas maraming channel, at mga serbisyong digital.

Magbibigay-daan ito sa Pilipinas upang makasabay sa pag-unlad ng teknolohiya sa buong mundo, suportahan ang kakayahang makipagsabayan ng industriya ng telebisyon, at maghatid nang mas pinahusay na serbisyo sa mga manonood.

Iminumungkahi ng National Telecommunications Commission (NTC) sa mga gumagamit ng analog TV na kumuha ng digital TV-ready recei­ver, smart TV, o set-top box (STB) upang makatanggap ng mga digital television (DTV) signal.

Para sa mga mayroon nang analog TV receiver, maaaring ikabit ang angkop na STB sa kasaluku­yang telebisyon upang makatanggap ng mga digital broadcast. Ang lahat ng mga subscriber ng mga serbisyong pantelebisyon—tulad ng Cable Antenna Television (CATV) at Direct-to-Home (DTH)/ Direct-to-Use (DTU)—ay hindi maaapektuhan ng ASO.

Ang mahalagang yugtong ito ay alinsunod sa NTC Memorandum Circular No. 05-11-2013, na inilabas noong ika-4 ng Nobyembre 2013, na nagpatibay sa paggamit ng Integrated Services Digital Broadcasting-Terrestrial (ISDB-T)—isang pamantayang DTTB mula sa Japan. Sa pamamagitan ng DTTB, ang bawat 6 MHz na channel ay maaaring maglaman ng maraming programa sa digital television, depende sa configuration ng transmisyon at kalidad ng video.

Sa ilalim ng angkop na mga configuration, ang isang channel ay maaaring magdala ng hanggang anim (6) na programang standard-definition (SD) o isang (1) programang high-definition (HD).

Ang ASO ay ang sapilitang pagpapatigil o pagwawakas ng analog terrestrial TV transmission at ang paglipat sa digital TV. Ito ay ipatutupad nang paunti-unti (sa mga yugto), at ang Mega Manila ang itinalagang pilot area (Unang Yugto) dahil humigit-kumulang 80% ng mga sambahayang may telebisyon dito ang nakatatanggap na ng digital TV broadcast. 

Ang NTC Memorandum Circular (MC) No. 005-11-2025, na pinamagatang “Guidelines for the Switch-Off of the Analog TV Service in Mega Manila,” ay inilabas noong ika-6 ng Nobyembre 2025 at nagsimulang ipatupad noong ika-22 ng Nobyembre 2025.