Comelec, ‘umabuso’ sa DQ ng Smartmatic – SC

MANILA, Philippines — Inihayag kahapon ng Korte Suprema na nagkaroon ng pag-abuso o grave abuse of discretion ang Commission on Elections (Comelec) nang idiskuwalipika ang service provider na Smartmatic bago pa man ito makapagsumite ng anumang bid para sa halalan.

“The SC held that Comelec committed grave abuse of discretion when it disqualified Smartmatic before it had submitted any bids, without any ­reference to the eligibility requirements prescribed by its Bids and Awards Committee,” ayon kay SC spokesperson Atty. Camille Ting, sa isang pulong balitaan.

Gayunman, nilinaw ni Ting na hindi pa rin sapat ang naturang findings ng mataas na hukuman upang ipawalang-saysay ang kontrata para sa vote-counting machines (VCMs) para sa 2025 elections sa South Korean firm Miru Systems.

Matatandaang noong Nobyembre 2023, diniskuwalipika ng Comelec ang Smartmatic mula sa lahat ng procurements ng poll body.

May kaugnayan ito sa alegasyon ng umano’y panunuhol laban kay dating Comelec chairman Andres Bautista, kapalit umano ng pagkakaloob ng kontrata para sa poll machines sa Smartmatic.

Giit naman ng Smartmatic, hindi patas ang pag-diskuwalipika sa kanila dahil ito’y base lamang sa mga news reports at mga hindi opisyal na dokumento mula sa ibayong dagat na hindi katanggap-tanggap sa anumang hurisdiksiyon, kabilang ang Pilipinas.

Naghain din ang Smartmatic ng petition for certiorari at humiling para sa paglalabas ng temporary restraining order (TRO) o writ of preliminary injuction sa mataas na hukuman.

Hindi naman pinagbigyan ng SC ang hiling na TRO o WPI ng Smartmatic dahil ayon kay Ting, ang Smartmatic ay isa lamang prospective bidder na walang aktuwal, malinaw at positibong karapatan.

Natukoy rin aniya ng Korte Suprema na wala rin itong anumang ‘irreparable injury’ na daranasin.

Sa kabila nito, pinagbigyan naman ng mataas na tribunal ang petisyon ng Smartmatic laban sa diskuwalipikasyon kaya’t maaari na itong lumahok sa mga susunod na halalan.