Pinoy scientists, researchers ‘hinarass’ ng China - BFAR

MANILA, Philippines — Hinarass umano ng Chinese helicopter noong weekend ang grupo ng Filipino scientists at researchers na nagsasagawa ng marine resource assessment sa Pag-asa Island dahilan para masugatan ang ilan sa mga ito.

Sa video na ipinalabas ng Bureau of Fisheries and Aquatic Resources ( BFAR), makikita ang People’s Liberation Army Navy helicopter na may tail number 57 na umaaligid sa taas ng Sandy Cay 3 at 4 at patuloy na sinusubaybayan ang ginagawa ng research team ng BFAR kasama ng mga scientist ng UP Institute of Biology, at National Fisheries Research and Development Institute (NFRDI).

Sinasabing pinilit ng helicopter na makalapit sa sand bar na kinaroroonan ng mga  researchers.

Natakot umano ang mga researchers nang bumaba ang helicopter nang may 50 talampakan mula sa lupa, sa loob ng halos 10 minuto.

Dahil dito, nasugatan ang ilang scientists at BFAR crew dahil sa malakas na hampas ng malakas na hangin at debris.

Muntik na ring malunod ang isang BFAR crew na nangangasiwa sa underwater drone dahil hindi siya makaalis sa tubig bunsod ng malakas na hanging dulot ng helicopter pero nasagip naman ito ng kanyang mga kasamahan.

Nakarinig din umano ang mga research divers ng “ping” sounds na may tatlong segundong pagitan habang sumisisid sa Cay 3.

Dahil sa insidente, pinabalik ng mission commander ang research team.

Naganap ang harassment sa parehong araw na binomba ng China Coast Guard vessels ng tubig ang Philippine resupply boat Unaizah May 4 sa rotation and resupply mission sa Ayungin Shoal.