Krisis sa bigas, titindi sa 2024

MANILA, Philippines — Nagbanta ang farmers group na Federation of Free Farmers (FFF) na higit na lulubha ang krisis sa bigas sa taong 2024.

Ito, ayon kay FFF National Chairman Raul Montemayor ay dulot nang patuloy na pagtaas ng halaga ng retail price ng bigas kahit na panahon ng anihan ng palay sa bansa.

Anya, makakaranas ang bansa ng kakulangan ng suplay ng bigas sa buwan ng Pebrero at Marso bago ang dry season harvest at sa buwan ng Hulyo hanggang Setyembre ng susunod na taon.

Sinabi ni Montemayor na kahit na may peak palay harvest season simula Oktubre 2024, mayroong magaganap na pagtaas sa retail price ng bigas dahil hindi na kasingdami ang ani ng palay ng mga magsasaka ngayon dahil sa mga kalamidad at El Niño phenomenon bukod sa wala namang aasahang malakihang importasyon ng bigas na papasok sa Pilipinas para punan ang malaking demand ng mamamayan sa bigas.

“We are seeing two reasons here, one, because of high imported rice. The high imported rice affects the domestic price, causing the farmgate price of palay to go up. Second, it is possible that our harvest is not that big contrary to the claim of the Department of Agriculture,” dagdag ni Montemayor.

Sinasabi anya na kapag may anihan ng palay ay bababa ang presyo pero hindi naman ito nangyayari dahil patuloy ang pagtaas ng presyo ng bigas. Ang farmgate price ng palay sa ngayon ay P30 per kilo. Anya, tumataas ang farmgate price ng bigas dahil sa kakulangan ng suplay.

“About two to three months from now, what would be our situation especially with the El Niño, our dry season crop in March and April would be affected and it could be worse in July, August and September, during the lean months next year,” sabi pa ni Montemayor.

Sa DA monitoring sa mga palengke sa Metro Manila, ang retail price ng local regular milled rice ay umabot na sa P56 per kilo; local well-milled rice ay P55 per kilo; local premium rice ay P60/kilo at ang local special rice ay P68.

Umaabot naman sa P58/kilo ang imported well-milled rice at ang imported premium rice ay P69/kilo habang ang imported special rice ay P65 per kilo.