Poe, Binay tabla sa Pulse presidential survey
MANILA, Philippines – Lamang man ng isang puntos, statistically tied o tabla pa ring maituturing sina Sen. Grace Poe at Bise Presidente Jejomar Binay, ayon sa pinakabagong Pulse Asia presidential survey na inilabas ngayong Biyernes.
Nakakuha ang independent candidate na si Poe ng 26 percent, habang 25 percent naman si United Nationalist Alliance standard bearer Binay.
Tabla rin sa ikatlo at ikaapat na pwesto sina Davao Mayor Rodrigo Duterte at Liberal Party standard bearer Mar Roxas na may 21 percent.
Pinakamababa sa mga presidential bets si Sen. Miriam Defensor Santiago sa 3 percent.
Samantala, dikitan din ang labanan sa pagkabise presidente kung saan magkasalo sa tuktok sina Sen. Francis Escudero at Sen. Ferdinand "Bongbong" Marcos Jr.
May 29 percent na natanggap si Escudero, habang 26 percent si Marcos, habang nasa ikatlong pwesto si Camarines Sur Rep. Leni Robredo sa 19 percent.
Magkakasunod naman sa baba sina Sen. Alan Peter Cayetano (12 percent), Sen. Antonio Trillanes IV (6 percent) at Sen. Gringo Honasan (4 percent).
Isinagawa ang survet nitong Pebrero 15 hanggang 20.
- Latest
