Mga taong ‘pulot’ o foundlings natural-born citizen - Sereno

MANILA, Philippines – Natural born citizen ang mga taong pulot o foundlings.

Ito ang pahayag kahapon ni Chief Justice Maria Lourdes Sereno sa ikatlong oral arguments tungkol sa kahilingan ni Sen. Grace Poe na baliktarin ang naging desisyon ng Comelec na nagkansela sa kandidatura nito bilang Pangulo ng bansa dahil sa isyu ng citizenship ng senadora.

Ani Sereno, noon pa mang mga nagdaang panahon, ang mga foundlings ay mga natural-born Filipinos.

Sa ginawang pagharap ni Comelec Commissioner Arthur Lim, sinabi ni Sereno na ang Korte Suprema ay may paniniwala batay sa dami na ng mga insidente na ang mga pulot ay natural born citizen batay sa jus sanguinis (right of blood) principle.

Diniin ni Sereno na sa Tecson vs. Comelec, nagdesisyon na ang ama ni Poe na si Fernando Poe Jr. ay isang natural-born citizen at maaaring tumakbong Pangulo ng bansa.

Malaki din anya ang paniwala ng korte na ang lolo ni Fernando Poe Jr. na si Lorenzo Poe ay isang natural-born bagamat ang basehan lamang dito ay ang kanyang death certificate noong 1984.

“In the absence of any evidence to the contrary, it should be sound to conclude, or at least to presume, that the place of residence of a person at the time of his death was also his residence before death,” pahayag ni Sereno.

Kahapon, inihalimbawa din ni Sereno ang naunang Court decisions na may kinalaman sa foundlings at kanilang citizenship.

“There is a need to apply the law with less severity and with compassion and humane understanding, for adoption is more for the benefit of unfortunate children,” sabi ni Sereno.

Una rito, iginisa kahapon ni SC Associate Justice Mariano del Castillo ang Commission on Elections hinggil sa mabagal at usad pagong na pagkilos ng ahensiya sa apela ni Poe noon pang nagdaang Disyembre.

Sinasabing noong December 23, 2015 lamang naipalabas ng Comelec ang desisyon na i-disqua­lify si Poe sa pagkandidato bilang Pangulo ng bansa. Noong panahong iyon, binatikos ng kampo ni Poe ang timing ng pagpapalabas ng Comelec decision, pero nakakuha naman ng TRO si Poe sa Korte Suprema para pigilan ang pagpapatupad sa desisyon ng Comelec.

Niliwanag naman ni Comelec Commissioner Arthur Lim na ang timing ng ahensiya ay hindi naman para gipitin si Poe.

“There was no deliberate intent to try to make life difficult for the petitioner. No, your honor, no. Absolutely none,” pahayag ni Lim.