PNoy may birthday wish kay Bam

MANILA, Philippines - “Sana’y patuloy kang maging inspirasyon ng mga kabataan.”

Ito ang kahilingan ni Pangulong Benigno “Noynoy” Aquino III sa kanyang mensahe para sa ika-36 na kaarawan ng pinsan niyang si Benigno “Bam” Aquino na isa sa mga kandidatong senador ng Tean PNoy.

Sa kanyang mensahe, itinampok ng Pangulo ang pagsasabuhay ni Bam sa paniniwalang tunay na makakabangon ang Pilipinas sa pagbubuklod-buklod at pagtulong sa kapwa. Tinuran niya ang pagsasabuhay ni Bam dito sa lahat adbokasya nito mula pagkabata tulad ng pagtatatag ng una nitong micro-enterprise na tunay na nakatulong sa maraming Pilipino.

“Sa iyong kaarawan at sa marami pang kaarawan na susunod-nananalig ako na lalalim pa ang iyong karunungan, habang ipinagpapatuloy mo ang iyong pagsulong ng reporma at pagbabago. Nawa’y maging inspirasyon ka sa mas marami pang mga kabataang Pilipino, para maging bahagi sila ng ating batas na isulong ang makabuluhang pagbabago sa ating bayan,” sabi pa ng Pangulo sa kanyang mensahe kay Bam.

Si Bam Aquino ay isang multi-awarded student at youth leader at pitong taon nang nakababad sa mga mahihirap na komunidad para iangat ang kita at kabuhayan ng mga pinakamaliliit na negosyante sa pamamagitan ng access to credit, markets, training, at support services.