Pasahero namatay sa CR ng eroplano
MANILA, Philippines - Isang 86-anyos na Amerikana ang namatay sa loob ng comfort room ng sinasakyang eroplano habang nasa kalagitnaan ng biyahe, kahapon ng madaling araw.
Kinilala ni Manila International Airport Authority (MIAA) doctor-on-duty Josefina Tria ang pasahero na si Julia Basquez Bolilan, na lulan ng Philippine Airlines (PAL) flight PR 105 mula San Francisco, California patungong Manila ng mangyari ang insidente.
Ayon sa ulat, nag-collapsed sa loob ng banyo ng eroplano si Bolilan at dito siya natagpuan ng mga kapwa pasahero na nakahandusay.
Sinasabing diabetic at hypertensive patient si Bolilan.
Isang Dr. Rizza Paredes na pasahero rin ang nagsagawa ng cardiopulmonary resuscitation kay Bolilan subalit idineklara rin itong patay bandang 12:30 ng madaling araw ng Sabado.
Sa ginawang pagsusuri ay cardiac arrest ang sanhi ng pagkamatay. Agad namang ipinaalam sa NAIA Terminal 2 clinic ang pagkamatay ng pasahero.
Nabatid na alas 5:48 ng umaga pa ang expected arrival ng eroplano sa NAIA 2.
- Latest
- Trending
