Kahit wala ng baha, medical mission ni VM Joy B patuloy

MANILA, Philippines - Patuloy pa rin ang pagsasagawa ng medical mission at livelihood programs ng tanggapan ni QC Vice Mayor Joy Belmonte kaugnay ng programang Joy of public service laan sa mga nabiktima ng pagbaha kamakailan sa QC.

Ayon kay Vice Mayor Belmonte, ang naturang ayuda ay bilang pagtitiyak na patuloy na natutugunan ng lokal na pamahalaan ang pa­ngangailangan ng mga constituents sa mga naapektuhan noon ng pagbaha at tuloy maalalayan ang mga itong makabangon mula sa epekto ng nagdaang kalamidad.

Buong buwan ng Agosto ay patuloy na nagkakaloob ang tanggapan ni Belmonte ng libreng general checkup, pre-natal, eye at skin diseases checkup, chest x-ray at pagkakaloob ng libreng gamot, school supplies sa mga mag-aaral at relief operation sa mga binahang taga QC partikular sa mga residente sa Bgys. Fairview, Del Monte, Doña Imelda at iba pa.

Katulong ng Vice Mayors Office sa pagseserbisyo ang mga doctor mula sa QC health department, Phil. Medical Association, Phil. Tubercolosis Society, ilang dermatologist at EENT doctors na naglaan ng oras para sa programang ito.

Nagkakaloob din ang tanggapan ni Belmonte ng livelihood programs sa mga binahang residente sa QC upang makatulong na makabangon mula sa epekto ng kalamidad at tuloy magkaroon ng maliit na pagkakakitaan para sa pagsisimula ng bagong buhay.