Sinibak na governor naghabol

Hiniling kahapon sa Court of Appeals ni Ba­taan Governor Enrique “Tet” Garcia na pigilan ang pagpapatupad sa isang kautusan ng Ombudsman na nagsusus­pinde sa kanya sa kan­yang posisyon kaugnay sa kasong plunder at graft na isinampa laban sa kanya.

Base sa 29-pahinang petition for certiorari na ini­hain ng abogado ni Gar­cia na si Atty. Emi­liano Pomer, hiniling nito ang pagpapalabas ng temporary restraining order para mapigil ang kan­yang suspension order at mga kasama nito.

Si Garcia at 19 pa nitong kasama ay sinam­pahan ng kasong plunder at graft noong Enero da­hil sa umano’y illegal na pagkumpiska at pagbe­benta ng P120 milyon ha­laga ng mga ari-arian ng naluging Sunrise Paper Product Industries Inc..

Sinabi ni Garcia na naghihiganti lang si Ombudsman Merceditas Gu­tierrez dahil sa pagkatalo ng kapatid nito sa mayoralty election sa Samal, Bataan noong 2007 election.

Sa kasalukuyan, nag­sasagawa ng vigil sa kapitolyo ng Bataan ang mga tagasuporta ni Gar­cia.Iginiit niya na hindi siya bababa sa puwesto kung walang TRO mula sa CA. (Gemma Amargo-Garcia at Jonie Capalaran)