Army men binalaan sa pagkakalat ng text

Binalaan kahapon ng Philippine Army ang mga opisyal at miyem­bro nito sa pagpapakalat  ng malisyosong text messages laban sa gob­yerno na posibleng ma­kapagpalala ng tensiyon sa pulitika sa bansa.

Ito’y sa gitna na rin ng imbestigasyon ng Senado sa maanomal­yang $ 329 milyong ZTE National Broadband Network deal na isini­walat ng star witness na si Rodolfo Noel “Jun “ Lozada.

Pinagsabihan ni Brig. Gen. Ricardo Morales, Camp Commander ng Phil. Army, ang mga sundalo na huwag mag­pakalat ng mga maling impormasyon o mga alingasngas laban sa administrasyon sa text messages dahil maaring magpalala lamang ito sa sitwasyon.

Sinabi ni Morales na may sariling mandate ang mga sundalo kaya dapat na dumistansya ang mga ito sa sigalot sa pulitika. (Joy Cantos)