Thunder mitabla na sab sa NBA finals, 2-2

CEBU, Philippines —  Si Shai Gilgeous-Alexander mibubo og 15 sa iyang 35 puntos sa katapusang kuwarter apil na ang unom ka krusyal nga free throws sa hilimatyong segundos dihang ang Oklahoma City Thunder impresibong namawi human maalkansi og 10 puntos aron pahilomon ang Indiana Pacers, 111-104, sa Game 4 sa NBA Finals kagahapong adlawa didto sa Gainbridge Fieldhouse sa Indianapolis, Indiana.

Tungod niini, gitabla sa sab sa Thunder ang serye sa baraha nga 2-2. Tataw na makahatag kini kanila og dugang kadasig padung sa Game 5 nga molabyog og balik didto sa ilang korte karong Martes, Hunyo 17.

Gawas ni Gilgeous-Alexander, mihimo sab og kasikas ang laing tulo ka mga sinaligan sa Thunder.

Si Jalen Williams mipupo og 27 puntos, si Chet Holmgren mipanso og double-double nga 14 puntos ug 15 ka rebounds samtang si Alex Caruso mitampo og 20 puntos alang sa Thunder, nga nabiyaan sa iskor nga 76-86 sa naghinapos nga bahin sa ikatulong kuwarter.

Apan ang Thunder milusad og mainit nga resbak aron ilogon ang labaw kortesiya sa 3-pointer ni SGA sa pinal nga tres minutos. Gisundan kini niya og pull-up jumper ug wala na sila molingi pa sukad niadto aron pagkab-ot sa mahinungdanong nga daog.

"It's a dog fight. Every time you step on the floor, on both ends of the floor they make you work," matud pa ni Gilgeous-Alexander nga mipasud og 12 sa 24 niya ka tira. Si Pascal Siakam mi-iskor og 20 puntos uban ang walo ka rebounds, lima ka assists ug lima ka steals aron pangulohan ang Pacers.

Sila si Tyrese Haliburton ug Obi Toppin nagkumnboya'g 35 puntos sa pilderong kawsa.