Cebu classic mitagak ni slaughter sa lineup

7-footer nga sentro miklaro nga dili kwarta ang isyu

CEBU, Philippines — Walay Greg Slaughter sa giatngan nga pagbalik sa Cebu sa 7th Maharlika Pilipinas Basketball League (MPBL) season nga gikatakdang mosikad karong Marso 8 didto sa Capital Arena sa Ilagan, Isabela.

Si Cebu Classic team owner Voltaire Morales Ora nagkanayon nga napugos sila pagtagak ni Slaughter sa ilang lineup tungod kay ang 7-footer nga Sugbuanong sentro nangayo og suholan nga sobra kaayo sa ilang nasabotan sa inisyal nilang panag-estorya.

"Abi nako okay na ang tanan kay ni-commit na siya ug nag-handshake nami. Nikuyog na gani siya namo sa team," matud pa ni Ora. Sa tinguha nga magpabilin si Slaughter sa team, si Ora mibutyag nga miabot pa gani sila ngadto sa pagtanyag niini og P900,000 nga suweldo matag bulan wa pay labot niini ang bonus matag duwa ug dugang insetibo nga mokabat og milyones kon maka-abante sila sa taas nga bahin sa torneyo apan gibalibaran sila sa kanhi bitoon sa PBA.

"Amo gibuhat kutob sa among makaya para sa Cebu pero wala nami mahimo kay dili man gyud siya (Slaughter)," dason pa ni Ora nga wala na mohatag pa og dugang detalye kabahin sa ilang negosasyon uban sa kanhi Ginebra big man. "Dili man sad puyde ihatag sa iyaha ang tanan. What if ma-injured siya? Kinahanglan nga highly competitive gihapon ang team bisan og wala siya," dugang pa Ora. Dali hinoon mipagawas og klaripikasyon si Slaughter pinaagi sa social media nga dili isyu ang pinansiyal nga aspeto sa makapakurat niyang pagbiya sa team.

"Money was not the problem, they agreed to my amount," dason pa ni Slaughter. "I don't want to join since we did not have any Cebuano players but instead a group from last year's Valenzuela team."

Apan ang gisulti ni Slaughter sukwahi kaayo sa pahamayag ni Ora nga adunay daghang mga Sugbuanong players nga maglangkob sa team.

Bisan og wala na si Slaughter sa eksena, si Ora mipadayag nga mas determinado sila nga mopadayon sa ilang laraw nga hatagan ang Sugbo og maanindot nga representasyon sa gipaabot niining pagbalik gikan sa lima ka tuig nga pahuway ning rehiyonal nga liga nga gitukod ni boxing legend Manny Pacquiao. Sa pagka karon, sila si Paolo Hubalde, Rashawn McCarthy,Darrell Manliguez ug Dennis Santos maoy nagbarog nga mga haligi sa kampanya sa Cebu.

Maghiusa sila og puwersa sa pipila ka lokal nga mga talento sama nilang Jonel Bongancisco, Shaq Imperial, Luigi Gabisan, Dolan Adlawan ug Bernie Bregondo sa Cebu nga hapit na makakumpleto sa ilang lineup uban ni Mike Reyes isip usa sa mga coaches nga mogiya sa team.