Donling 2-0 na sa Javier Ceramics Cup 2023
CEBU, Philippines — Nakasagunson og duha ka daog ang Donling Aircon and Refrigeration Services ug ning higayona batok sa Cakes and Memories, 55-50 sa Javier Ceramics Cup 2023 niadtong Domingo diha sa Ateneo de Cebu sa Mango Avenue, Cebu City.
Gumikan niini, ang Donling ni Romeo Quilaton Jr. nakigsawo na sa unang dapit sa standing uban sa Zynergia ug JMD Automotive sa managsama nilang baraha, 2-0 ning maong liga nga giorganisar sa Brothers Ball League.
Si Roldan Daug nga daku'g iskor sa maong daog maoy napiling best player of the game pinaagi sa iyang 17 puntos, siyam ka rebounds ug duha ka assists. Si Angelo Ponce midugang og 15 puntos.
Ang Cakes and Memories gipangulohan ni Charlee Lumasag nga misansan og 14 puntos, samtang sila si Kenn Sasiya ug Rico Rosaroso mitampo'g 10 puntos matag usa sa Cakes ang Memories ni Allan Paris Caballes.
Miarangkada sab ang Jot Trucking human naabiriya sa una nilang duwa dihang ilang gipanitan ang JJS Electrical Supplies, 65-50 ubos sa pagpangulo ni JJ Vestra nga mao sab ang best player of the game pinaagi sa iyang 16 puntos, upat ka assists ug tulo ka rebounds.
Si Fritz Enriquez miamot og 12 puntos, samtang sila si Dondon Barcoso ug Jeffrey Francisco nagtampohay og 10 puntos sa team ni Jeffrey Tagacanao.
Ang JJS Electrical ni Jeffrey Banaag gipangulohan sab ni Joshua Banaag nga adunay 12 puntos, gisundan ni Francis Bauntad sa iyang 11 puntos.
Sa maong kadaugan, ang Jot Trucking aduna na'y 1-1 nga baraha uban sa ilang biktima nga JJS Electrical ug Cakes and Memories.
PUNTOS MATAG USA
Unang duwa
Donling (55) — Daug 17, Ponce 15, Lumoya 9, Adolfo 7, Lumoya 7, Ravina 5, Isip 4, Colansi 3, Velasco 2.
Cake and Memories (50) — Lumasag 14, Sasiya 10, Rosaroso 10, Bauntad 9, D. Ygot 2, Binondo 2, Capangpangan 2.
Ikaduhang duwa
Jot (65) — Vestra 16, Enriquez, 12, Francisco 10, D. Barcoso, 10, Antona 9, RJ Bautista 9, Barcoso Jr. 6, Rivera 6, Bautista 2.
JJS (50) — Josh. Banaag 12, Bauntad 11, Ramas 8, Vargas 6, Agustin 6 , Dronio 2, Awit 2, Pagambunan 2, Cardoza 2, Banaag 2.
- Latest
