Cebu Landmasters 2003 mirehistro'g 8-0 sweep
CEBU, Philippines — Ang Cebu Landmasters Batch 2003 mikastigo sa Casino Ethyl Alcohol Batch 2010, 83-61, aron pagkumpleto og dalaygong 8-0 sweep sa eliminasyon sa Division B sa Sacred Heart Ateneo Alumni Basketball Athletic Association (SHAABAA) Season 25 niadtong Miyerkules sa gabii didto sa Magis Eagles Arena sa Barangay Canduman, dakbayan sa Mandaue.
Si Carlo Alerta mitali og 17 puntos, si Mocrief Rogado mipupo og 12 puntos, pito ka rebounds, unom ka assisys ug tulo ka steals samtang sila si Justin Huang, Wilmer Ong ug RJ Abalos mitampo og 10 puntos matag usa alang sa Batch 2003 nga maoy ikaduhang team nga na-iskor og sweep sunod sa Asian Orthopedics Batch 2014 sa Division C.
Sa Division A, ang Magis Medical Fund Batch 1997 miposte sa ikaunom nilang sagunson nga daog human gipaksit ang Vivant Corenergy Batch 1994, 64-58, samtang ang Dynacast Batch 2001 midemolis sa Speed Demon Batch 1996, 105-56.
Ang Batch 1997 nagsolo na karon sa ikaduhang dapit uban ang 6-2 win-loss record samtang ang Batch 2001 nakigsawo uban sa AutoLAB Batch 1999 sa ikatulong puwesto bitbit ang managsamang 5-2 nga baraha.
Sa laing resulta, si Maverick Suarez mibugha og 32 puntos ug 18 ka rebounds sa dihang gipakaging sa Carampatana Food, Inc. Batch 2012 ang Batch 2019, 96-79, aron angklahan ang No.2 spot sa Division C uban ang 7-1 nga marka.
- Latest
