Mga Pinoy may potensiyal modominar sa MMA
LAS VEGAS - Wa'y duda nga ang boksing ang numero unong combat sport sa nasud, apan dili ikalimod nga hinay-hinay na nga misulbong ang mixed martial arts (MMA) diin daghan mga Pinoy fighters ang nangandoy nga mosikat ug makasulod sa Ultimate Fighting Championship (UFC), ang giisip nga labing dakong entablado sa MMA.
Gani ang mga fighters gikan sa UFC ang nakamatikod ug miila sa dakong potensyal sa mga Pinoy nga modominar ugma damlag.
Sa kalampusan ni eight-division world champion Manny Pacquiao, pipila ka UFC fighters nagtuo nga aduna ra usab Pinoy nga modominar sa steel cage.
"I'm an avid fan of Pacquiao and his great boxing skills. My wife is a Filipina so I can say I know the culture and I believe Filipinos have the shot to make it big time (in MMA)," matud pa ni UFC welterweight contender Alex Morono.
Ang 30-anyos nga si Morono mipakugang sa kalibotan sa MMA human niya gipaundang sa first round ang MMA legend nga si Donald 'Cowboy' Cerrone didto UFC APEX dili pa lang dugay.
"I am a black belt in Brazilian Jiujitsu and taekwondo but I worked on my boxing and I am happy that I accomplished my goal of finishing him (Cerrone) by punches," matud pa ni Morono nga usa lang unta ka last-minute replacement.
Sa nag-unang interview, si UFC big boss Dana White una na nga miisip sa Pilipinas nga usa sa mga nasud sa Asya uban ang Thailand, China ug Singapore diin magagikan ang umaabot nga MMA superstars.
Positibo ang UFC nga sa padayon nga pagbangon sa kalibotan gikan sa pandemiya, makabalik sila sa Asya ug makahimo og laing MMA card sa Pilipinas.
Ang UFC mihimo sa labing una nilang fight card pito ka tuig na ang milabay diin nagsangka ang mga lightweight stars nga sila si Uriaj Faber ug Frankie Edgar didto sa Mall of Asia Arena.
- Latest
