_banat
^

Kalampusan sa kalisdanan

KNAK AWT - Emmanuel B. Villaruel (Banat) - May 13, 2021 - 12:00am

Gamay'ng tawo, hilumon ug kalma. Mao kini ang una nakong impresyon kaniya. Apan sa iyang pagkahilumon, aktibo siyang tigsuporta sa Cebu basketball. Kon ugaling dunay mga liga, kanunay siyang moporma og team nga usahay manghawod sa torneyo nga ilang salmotan. Gani ang iyang team maoy nakampiyon sa Cebu City Charter Day Cup, ang katapusang kasikas sa basketbol dinhi sa Sugbo sa wala pa miulbo ang kalibutanong pandemiya sa miaging tuig.

Ang akong gipasabot mao ang Sugbuanong magpapatigayon nga si Ricky Verdida nga tinamod sab nga patron sa basketbol. Una ming naghimamat ni Verida sa dihang gipaila-ila niya ang iyang KCS (Kiboy's Computer Solutions)-Mandaue team nga milangkat sa titulo sa bag-ohay pa lamang nahuman nga Visayas leg sa Pilipinas VisMin Super Cup  didto sa Alcantara Civic Center sa Alcantara, Cebu.

Sa sinugdanan pa lamang, gamay ra kaayo ang mihatag kanila og tsansa nga mokulit og marka, labaw nang birahon ang korona. Apan nagmilagro ang KCS-Mandaue, ilang gipiog ang inilog kaayong MJAS Zenith-Talisay City Aquastars sa best-of-three finals aron pagkulit og kasaysayan isip labing unang kampiyon sa linghod nga liga. Sa tinagakay nga Game 3, ilang gipahubas ang Aquastars, 89-75. Gawas nga miangkon og luna sa VisMin Super Grand Finals diin ilang harungon ang Mindanao champion karong Agosto, mibulsa sab ang KCS-Mandaue og P500,000 nga ganti.

Niatong higayona, ang KCS-Mandaue miduwa sa ikalimang higayon sud sa unom ka adlaw. Apan mitaak sila sa korte nga napuno sa enerhiya. Sa pikas bahin, ang MJAS-Talisay na hinuon maoy naluya bisan pa man og mihaw-an gikan sa taas nga pahuway kay naka-angkon og awtomatik nga luna sa finals human mikumpleto og 10-0 sweep sa duha ka hugna nga eliminasyon.

Naghudyaka man tuod ang KCS-Mandaue, apan luyo sa mabungahon nilang kampanya mao ang daghang mga hagit nga ilang naagian. Ngitngit ug mapit-os nga dalan ang ilang gitungas sa wala maabot ang kinatas-ang bahin sa kadaogan. Pahungaw pa ni Verdida nga Mandaue man tuod ang ilang gidala, apan wala sila'y nadawat bisan gamay nga suporta sa dakbayan nga ilang girepresentahan.

Bisan pa man niining tanan, nagpursige si Verdida. Kaabag si Renan Agudo sa GDSM Marketing, nagpadayon siya sa iyang misyon isip usa ka mapasigarbuhon nga Mandauehanon. Labaw sa tanan, dili na siya bag-o pa niining mga mapait nga bahin sa kinabuhi. Si Verdida kanhi usa ka basurero sa wala pa makakaplag og maayong palad gumikan sa iyang disiplina, determinasyon ug kakugi. Mao nang daghan man tuod ang mga pagsulay nga mihampak kaniya, nagpabilin siyang malampuson taliwala sa kalisdanan.

BASKETBALL
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with