Legasiya ni Baham Mitra

Sa miaging semana, ang garbo natong mga Pinoy nga si Games and Amusements Board (GAB) chairman

Abraham Kahlil 'Baham' B. Mitra gidayeg sa World Boxing Council gumikan sa dili hitupngan niyang mga naambag sa WBC, usa sa tinamod nga mga organisasyon sa boksing sa kalibotan.

Bililhon ug kugihan nga miyembro sa WBC Board of Governors, si Mitra maoy responsable sa pagpalagsik og balik sa Oriental and Pacific Boxing Federation sa dihang siya nagsilbe isip tsirman niini. Siya sab maoy nahimong taytayan aron matabangan kadtong mga boksidor nga nangahagba panahon sa kalisdanan pinaagi sa Jose Sulaiman Boxers Fund sa WBC.

Usa sa labing dako nga nakab-ot ni Mitra mao ang paglihok aron mamahimong usa ka international event ang Women`s Convention sa WBC. Gani niadtong 2018, giusa ni Mitra ang Women's Convention sa WBC Asia Summit nga gipahigayon sa Manila.

Apil sa labing nindot nga nahimo ni Mitra mao ang paghan-ay sa mga patakaran sa panglawas ug kaluwasan sa tinguha nga mabalik ang pro sports sa nasud taliwala sa pandemiya. Nagmalampuson siya niining aspeto ilabi sa boksing ug basketbol.

Dili na maihap ang maayo niyang mga nabuhat alang sa kaayohan sa mga boksidor ug ingon man sa pro sports sa nasud sa kinatibuk-an. Apil na niini ang pag-implementar sa libreng medikal nga eksaminasyon sa tanang mga boksidor sa dili pa sila hatagan og lisensiya. Mao nang ang GAB, ubos sa liderato ni Mitra gipasidunggan nga WBC Boxing Commission of the Year niadtong 2017.

Ngadto sa mga wala masayod, si chairman Baham kamanghuran sa unom ka lalaking mga anak ni anhing House Speaker Ramon V. Mitra, nga usa sa labing maayo, labing ligdong ug prinsipyado nga politiko sa kasaysayan sa Pilipinas.  Si chairman Baham misunod sa tunob sa banggiitan niyang amahan ug nahimong kongresista sud sa tulo ka sagunson nga termino (2001-2010) ug nahimong gobernador sa Palawan sud sa tulo ka tuig (2010-1013).

Ning bag-ohay pa lamang, nahimong sentro sa atensiyon si Mitra gumikan kay ang iya mang ahensiya maoy nangu pag-imbestigar sa nahitabong kontrobesiya sa Pilipinas VisMin Super Cup tungod sa kataw-anan nga duwa tali sa Siquijor Mystics ug ARQ Builders Lapu-Lapu City Heroes sa miaging semana didto sa Alcantara, Cebu. Miresulta kini sa mga alegasyon nga dunay game-fixing nga nahitabo sa maong duwa. Lain na sab kining labad sa ulo ni Mitra, kansang misyon mao ang pagpakgang sa tanang mga binuang, pagpanikas, ug uban pang iligal nga mga aktibidades sa sports sukad siya miasumir isip tsirman sa GAB. Matud pa sa kanhi kauban nako sa Cebu sports media ug suod nakong higala nga si Salven Lagumbay, nindot ug haruhay ang pagkabutang sa kinabuhi ni Mitra. Mahimo siyang magpuyo nga malinawon sa lapad kaayo niyang umahan didto sa Palawan diin puwede niyang atimanon ang iyang mga kabayo, mga manok ug uban pang mga hayop samtang maglingaw-lingaw uban sa iyang pamilya matag adlaw.

Apan nganong misud man si Mitra sa GAB diin labad ug sakit sa ulo lamang maoy iyang makuha? Kini gumikan kay naglatay man sa iyang dugo ang paghalad og serbisyo sa katawhan. Tiunay, sinsero ug maisugon ang pagdala niya sa iyang papel isip trabahante sa publiko nga atong mapanaminan sa dalaygon niyang mga nakab-ot ug binuhatan. Dili matugkad ang iyang kahago ug sakripisyo aron lamang mapatuman og ensakto ug matarong ang misyon nga gipatuman sa ahensiya nga iyang gikuptan. Mao kini ang legasiya ni Baham Mitra isip GAB chairman.