Team LeBron wala pa'y pilde sa All-Star Game

CEBU, Philippines — Nakabaton og perpektong rekord ang Team LeBron sa All-Star Game game nga didto duwaa sa State Farm Arena sa Atlanta, Georgia kagahapon.

Gumikan sa Covid-19 pandemic, ang  2021 All-Star  Game giusa pagpahigayon uban sa skill challenge, 3-point ug slam dunk contest sa usa ka gabii. 

Ang Team LeBron sa pagpangulo ni LeBron James sa Los Angeles Lakers mipilde sa Team Durant ubos sa liderato ni Kevin Durant sa Brooklyn Nets sa iskor nga 170-150.

Karon, si James adunay 4-0 record. Iyang gipilde si team ni Stephen Curry niadtong 2018 ug ang team ni two-time reigning MVP Giannis Antetokounmpo sa miaging duha ka tuig.

Gisugdan ang mga kalihukan pinaagi usa ka drama dihang wala paapila sa duwa ang Philadelphia 76ers' All-Stars nga silang Joel Embiid ug Ben Simmons kay nagpatupi sa usa ka barbero didto sa Philadephia nga nagpositibo sa coronavirus.

Ang bitoon sa Milwaukee Bucks nga si Giannis Antetokounmpo maoy nangu sa Team LeBron, kinsa walay sipyat sa 16 niya ka mga itsa sa kinatibuk-an niyang 35 puntos.   

Sumala pa sa Elias Sports Bureau research, si Antetokounmpo mitala og labing taas nga field goal percentage (100%) sa tanang player nga mihimo og dili momenos 10 ka shot attempts sa All-Star Game. 

 Sa gipakitang duwa ni Antetokounmpo, siya ang napiling Most Valuable Player (MVP). 

Gawas ni Antetokounmpo, si Stephen Curry  sa Golden States Warriors nakahatag sab og dakong dungog sa Team LeBron dihang siya ang naghari sa 3-point shootout competition. Nakapasud siya og walo ka 3-pointers.

Si Curry miamot og 28 puntos, samtang si Damian Lillard sa Portland TrailBlazers mitampo og 32 puntos sa Team LeBron. Ang Team Durant gipangulohan ni Bradley Beal nga mipabuhagay og 26 puntos.

Wala hinuon moduwa ang team captain nga si Durant tungod sa injury.