MPBL nakalusot

Sa miaging bulan, ang Department of Health (DOH), Philippine Sports Commission (PSC) ug Games and Amusements Board (GAB) mipagawas og hiniusang direktiba nga nagmando nga kadto lamang mga prospesyonal nga liga ug pro sports ang tugotan nga makapahigayon og kompetisyon taliwala ning pandemiya.

Apan lahi ang kaso sa Maharlika Pilipinas Basketball League (MPBL), ang liga nga gitukod ni boxing superstar ug senador Manny Pacquiao upat ka tuig na ang milabay.

Ang MPBL dili usa ka propesyonal nga liga, apan ning bag-o pa lamang gitugotan kini sa Inter-Agency Task Force (IATF) nga makapadayon sa ilang Lakan Cup playoffs karong Marso 1 ngadto sa Marso 15 didto sa Subic ubos sa istriktong patakaran sa panglawas ug kaluwasan. Nganong nahimo man kining posible?

Salamat sa memorandum circular No. 2021-0011 nga gipagawas sa DOH niadtong Pebrero 18. Kini naglatid nga mahimong ipahigayon ang training ug mga kompetisyon sud sa gitawag nga "bubble" sa mga dapit nga mubo kaayo ang risgo ug anaa sa mas luag nga modified general community quarantine kon MGCQ.  Gawas niini, kinahanglan nga dunay usa ka nasudnong ahensiya nga mopaluyo sa usa ka liga. Sa habig sa MPBL, gisuportaan kini sa Subic Bay Metropolitan Authority (SMBA) mao nang makabuylo na ang liga sa umaabot niining torneyo nga nabalda sa miaging tuig tungod sa pagpanghasi sa Covid-19.

Bisan pa man sa pagdumili sa MPBL nga mosud sa kalibotan sa pro kay lagi usa kini ka amateur nga organisasyon, makahimo og kasikas ang liga ug makatiwas sa ilang aksiyon ning panahona. Sama sa usa ka abtik nga guwardiya, nakapangita gyud og paagi ug nakalusot ang MPBL ning sitwasyona.