Bernaldez, Bacon daog; Moralde na-KO

CEBU, Philippines — Yano kaayong midaog sila si lightweight prospect Mark 'Machete' Bernaldez ug welterweight contender James Bacon sa Sanman Gym nga nagbasi sa General Santos City batok sa ilang mga kontra gikan sa Argentina sa "Fight Night VIII" nga pasundayag sa M&R Promotions kagahapon sa buntag didto sa Manual Airtime Community Center Theater sa Miami, Florida.

Ang 26-anyos nga si Bernaldez mitumba ni Julian Evaristo 'Chipita' Aristule tulo ka higayon dayon na ngadto sa pagkulit og impresibong kadaogan pinaagi sa 3rd round TKO. Gumikan niiini, giinat ni Bernaldez ang iyang rekord ngadto sa 21-4 nga gidayan-dayanan na karon og 15KOs. Si Aristule natagak sa 34-14 uban ang 17KOs.

Mikuha sab og atensiyon si Bacon human kini mipatugpa og hait nga kombinasyon sa tiyan apil na ang solidong left uppercut nga nakapahagba ni Gonzalo Carlos Dallera sa hinapos nga bahin sa ikaduhang hugna.

Si Bacon nagkupot na karon og baraha nga 24-2 uban ang 16KOs, samtang si Gonzalo nakatilaw sa ikasiyam niyang pilde sa 15 ka away uban ang 14KOs.

Didto sa MGM Grand bubble sa Las Vegas, wa'y suwerte ang stablemate nilang Bernaldez ug Bacon nga si super featherweight contender John Vincent Moralde gumikan kay napilde kini pinaagi sa 1st round knockout batok sa Mehikanong si Jose Enrique Vivas. Human gipalukapa ni Vivas si Moralde sa ikaduhang higayon, ang reperi miundang sa away sa oras nga 1:16 sa unang hugna gumikan kay ang Pinoy'ng boksidor nagping-it naman sa tumang kasakit.

Si Vivas nagbitbit na karon og 20-1 nga baraha uban ang 11KOs, samtang si Moralde nadakin-as ngadto sa 23-4 uban ang 13KOs.