NBA players mitaak na sa orlando

CEBU, Philippines — Nagsugod na og pangabot ang mga NBA players didto sa Orlando, Florida aron atubangon ang kinabuhi ubos sa giplastada nga 'bubble' sa liga didto sa Walt Disney World diin tiwason ang nahibiling bahin sa 2019-2020 season.     

Atol sa ilang pag-abot, ang mga players gi-test alang sa coronavirus sud sa 'quarantine zone' nga gidesinyo aron malikayan ang pagkuyanap sa gikahadlukang virus sud sa Disney resort.

Kinahanglan nga makapasar sila sa laing test nga pagabuhaton sud sa dili momenos 24 oras gikan sa una nilang test sa dili pa sila makasud sa 'bubble' ug makapahimus sa tanang serbisyo nga gidalit sa prestihiyosong Walt Disney resort ug sports complex.

Ang mga teams makasugod na sab dayon sa ilang training camp workouts kon makumpleto na nila ang ilang kwarantin.

Ang tune-up games tugotan unya pa sa Hulyo 22 kon usa ka semana sa dili pa magsugod og balik ang aksiyon sa liga diin 22 ka teams ang magsangka alang sa 16 ka luna sa playoffs nga moarangkada sa Agosto 16.

Duna hinuo'y pipila ka players nga walay salig sa 'bubble' nga gimugna sa NBA aron pagseguro sa panglawas ug kaluwasan sa tanan. Apil na niini sila si Joel Embiid sa Philadelphia 76ers ug Damian Lillard sa Portland Trail Blazers.