Bernaldez napakyas
CEBU, Philippines — Napakyas si Mark 'Machete' Bernaldez sa iyang misyon human siya gibuntog sa wa'y pildeng Amerikanong si
'Prince' Albert Bell pinaagi sa unanimous decision sa 'Live Boxing is Back' series sa Top Rank kagahapon didto sa MGM Grand sa Las Vegas.
Ang 6-footer nga si Bell, mas taas og upat ka pulgada ni Bernaldez, migamit sa iyang gitas-on, taas nga kasway ug hait nga abilidad aron dominahon ang pambato sa Sanman Gym sud sa 10 ka hugna.
Ang mga hurado nga sila si Tim Cheatham, Max DeLuca ug Richard Ocasio parehong miiskor og 100-90 alang ni Bell.
Inutok kaayong miduwa sa gawas si Bell ug gibiradahan si Bernandez sa hagpok niyang jabs ug mga kombinasyon.
Na-injured ang tuong kamot ni Bell sa hinapos nga bahin sa ikasiyam nga hugna human siya nakalandig og solidong suntok sa nawong ni Bernandez.
Apan si Bernandez wala makapahimus sa higayon bisan og si Bell miaway gamit ang usa na lamang ka kamot sa ika-10 ug katapusang hugna.
Si Bell miinat sa perpekto niyang rekord ngadto na sa 17-0 uban ang 5KOs, samtang si Bernaldez natagak ngadto sa 20-4 uban ang 14KOs.
- Latest
