Lassiter na-injured

CEBU, Philippines – Napun-an ang kalbaryo sa San Miguel Beermen management dihang ang lain nilang sinaligan nga si Marcio Lassiter   nakaangkon og seryosong injury ug posible nga dili makaduwa sa sayong bahin sa PBA All-Filipino Cup nga buksan sunod bulan.

Si Lassiter matud pa, nakahiagum og buak sa iyang ilong dihang aksidente kining nasikhan atol sa ilang duwa batok Rain or Shine Elasto Painters sa usa ka tune-up game sa miaging semana.

Ang nahitabo ni Lassiter giisip nga laing pagsuway sa Beermen nga una na nga nahugno kay  dili  kaduwa sa tibuok conference si JuneMar Fajardo tungod sa seryosong injury sa tiil.

Dili sama ni Fajardo, si Lassiter masaligon nga makabalik dayon siya og duwa ug positibo sa tsansa sa Beermen nga mosakmit sa ikaunom nilang sunod-sunod nga Philippine Cup championship.

Sa iyang bahin, ang kontrobersiyal nga forward sa San Miguel nga si Arwind Santos nagkanayon nga dili angay nga isipon sa ubang koponan nga mihuyang sila tungod lang kay dili kaduwa si Fajardo.

Alang sa 6-foot-7 nga si Santos, nga sila gihapon ang numero unong title contender sa umaabot nga conference.