Warriors buhi pa

CEBU, Philippines – Ang gikaintapang "Splash Brothers" nga sila si Stephen Curry ug Klay Thompson milansang og krusyal nga mga tres sa himalatyong segundos sa dihang ang Golden State Warriors nakaangkon og og laing kinabuhi human makaipsot batok sa Toronto Raptors, 106-105  sa kulbahinam kaayong Game-5 sa NBA Finals kagahapon didto sa Scotiabank Arena sa Toronto, Canada.

Alkansi pa hinuon gihapon sa serye ang Warriors, 2-3, apan tataw nga ang maong daog makapabalik sa ilang kompiyansa ug makapadasig kanila ilabi na kay ang Game-6 molabyog didto sa ilang korte karong Biyernes.

Si Curry mikadlit  og 31 puntos, samtang si Thompson miamot og 26 puntos alang sa Warriors nga mipabuhi sa ilang tsansa nga makasakmit og 'grandslam' title, butang nga katapusang nakab-ot sa LA Lakers niadtong 2000 ngadto sa 2002.

Sa kasaysayan hinuon sa NBA Finals, usa pa ka team ang nakampiyon human mabiyai og 3-1 sa usa ka best-of-seven series. Nahimo kini ni LeBron James ug Cleveland Cavaliers niadtong 2016 nga sulagma kaayong batok sa Warriors.

Taliwala sa ilang kadaogan duna na sa'y dili maayong balita nga miabot sa Warriors kay na-injured na man sab ang bag-ohay pang mibalik nilang superstar nga si Kevin Durant. Si Durant miiskor og 11 puntos sud sa 12 ka minutos sa wala pa makahiagum og angol sa tuo niyang tiil

Bisan pa man niini, ang Warriors mipakita og igong kadasig ug determinasyon dayon na ngadto sa pagkulit og mahinungdanong daog nga temporaryong nakadiskaril sa gihandum sa Raptors nga mosuway og kulit og kasaysayan.

Nagdanga-danga na unta    ang  Raptors ngadto sa kasaysayan sa dihang nakabangon sila human malubong og 14 puntos sa ikatulong kuwarter. 

Luyo sa pagpanginit ni Kawhi Leonard nga mirehistro og 10 ka sunod-sunod nga puntos, apil na ang duha ka hagpok nga tres, ang Raptors nakatilaw sa kinadak-an nilang labaw, 103-97 sa nahibilin nga 3:28 sa duwa. 

Apan sa kalit lang, sila si Curry ug Thompson miposa og tulo ka sagunson nga tres nga nakapaabante og balik sa Warriors, 106-103 sa nahibiling 57 segundos sa duwa.

Ang Raptors nakasikit ngadto sa usa na lang ka lugas human si Kyle Lowry mipasud sa iyang tira sa katapusang 30 segundos sa aksiyon.

Duna pa unta'y katapusang tsansa ang Raptors nga kawaton ang daog human si DeMarcus Cousins nga mitampo og 14 puntos sa Warriors, natawgan og foul gumikan sa pagmugna niini og illegal screen. Apan si Leonard nadepensaan og maayo sa Golden State samtang ang 3-pointer ni Lowry natapalan ni Draymond Green dayong kapupos sa oras hinungdan sa paglumpayat sa Warriors sa tumang kalipay.