Kalbaryo sa Lakers napun-an
CEBU, Philippines – Misamot og kahanap ang paglaum sa Los Angeles A Lakers nga makasud sa playoffs human makatilaw og laing pait nga kaparotan, ning higayona sa mga kamot sa silingan nilang L.A. Clippers, 113-105 sa NBA kagahapon didto sa Staples Center.
Si Danilo Gallinari mibahog og 23 puntos ug si Lou Williams miamot og 21 puntos sa dihang gitiwasan sa Clippers ang kalbaryo sa Lakers.
Samtang naminghoy ang Lakers, ang Clippers nagmaya kay nagpabilin sila sa ikapitong puwesto sa Western Conference bitbit ang 37-29 record.
Si LeBron James mikabkab og 27 puntos ug si Rajon Rondo mitali sa ika-32 nga 'triple-double' sa iyang karera uban ang 24 puntos, 12 ka assists ug 10 ka rebounds alang sa Lakers nga natagak ngadto sa 30-34 human mapilde sa ikasiyam nga higayon sa miagi nilang 12 ka duwa.
Sa laing aksiyon, sila si DeMar DeRozan ug LaMarcus Aldridge nagkumboya'g 46 puntos alang sa San Antonio Spurs nga nakasugakod sa init nga ratsada sa Denver Nuggets sa nanghinapos nga bahin sa duwa aron pag-ipsot niini ngadto sa 104-103 nga daog.
Ang Spurs nakasagunson na karon og tulo ka daog, samtang ang Nuggets natikalbong sa ikatulong sunod-sunod nga higayon.
Didto sa Phoenix, si Kelly Oubre Jr. mikolekta og 27 puntos ug 13 ka rebounds sa dihang gipakuratan sa Suns ang haring gangis karon sa liga nga Milwaukee Bucks, 114-105.
Si Devin Booker miamot og 22 puntos ug si Deandre Ayton dunay 19 puntos ug 12 ka rebounds sa Suns nga miposte sa ika-14 pa lamang nilang daog nga giatbangan og 51 ka pilde.
Si All-Star forward Giannis Antetokounmpo mikadlit og 21 puntos ug 13 ka rebounds ug si Malcolm Brogdon mirehistro og 19 puntos sa Bucks nga nasagunsonan og duha ka pilde sa labing unang higayon karong season.
- Latest