Danao mo- host tulo ka triathlon events

CEBU, Philippines — Ang dakbayan sa Danao mopahigayon og tulo ka dagkong triathlon events karong summer.

Una, ang nagduma sa National Age-Group Triathlon Series mitahas sa Danao City Sports Commission pagpadagan sa ikaduhang  leg sa serye niini karong tuiga.

Wala pa hinuon matino kun mobalik ba kini sa Danao o adto gihapon pagahimuon sa isla sa Camotes karong Marso 25.

Unya sa Abril 15, ang cycling event sa Philippine National Games (PNG) adto kumbatihan sa Danao. Kini naglangkob og road cycling ug mountain bike.

Mga kategoriya ubos sa road cycling mao ang criterium, road race ug individual time trial, samtang ang mountainbike dunay downhill ug cross-country.

Usa ka semana human niini, ang Danao   mo-host sa Xterra Asia-Pacific Championships, ang labing dako nga off-road sa triathlon sa nasud karong Abril 22.

Mao kini ang labing unang higayon nga anhi sa Pilipinas mahitabo ang maong event. Gawas sa triathlon, duna sa’y duathlon ug trail run ang maong makutas nga lumba.