James nag-wild

CEBU, Philippines — Si LeBron James mipabuhagay og 39 puntos ug milangkat og 14  ka  rebounds sa dihang ang Cleveland Cavaliers nakabawi gikan sa bugnaw nga sugod aron pag-ikyas bitbit  ang  118-113 nga daog batok sa Los Angeles Clippers  sa NBA kagahapon didto sa Quicken Loans Arena sa Cleveland, Ohio.

Midugang si Kevin Love og 25 puntos, apil na niini ang duha ka tres nga maoy nakapabuhi sa dugo sa Cavs sa  overtime.

Wala sab magpabitin si Dwyane Wade nga mitimbre og 23 puntos ug 11 ka rebounds alang sa Cavaliers nga nakasagunson na karon og upat ka daog aron pag-inat sa ilang rekord ngadto sa 9-7.

Si Blake Griffin adunay 23 puntos ug si DeAndre Jordan mihipos og 20 puntos uban ang 22 ka rebounds, apan silang duha wa’y nahimo gumikan kay ang Clippers milagapak ngadto sa ikapito nilang sunod-sunod nga pilde.

Kanunay nga naggukod ang Cavs gikan sa pagsugod sa duwa ug nakapuwersa sila og overtime human si James milansang og 3-pointer gikan sa  assist ni Love sa nahibiling 47 segundos sa regulasyon.

Didto sa San Antonio, Texas, ang Spurs impresibong mibangon human malubong og 23 puntos aron pagpakaging sa Oklahoma City Thunder.

Si LaMarcus Aldridge mipugnit og 26 puntos, samtang sila si Danny Green ug Pau  Gasol nagkumboya’g 31 puntos aron pagtuboy sa Spurs ngadto sa ika-10 nilang daog sa 16 ka duwa.

Ang follow-up shot ni Aldridge gikan sa sipyat nga tres ni Green maoy nakapaginhawa og lawom sa Spurs  uban ang 102-99 nga labaw sa nahibilin nga 24.2 segundos sa duwa.

Nakasikit sa katapusang higayon ang Thunder sa iskor nga 101-102 gumikan kay si Gasol milansang og duha ka free throws aron pagselyo sa kadaogan sa Spurs.

Si Carmelo Anthony dunay 20 puntos, samtang si Russel Westbrook mipatik lamang og 15 puntos sa Thunder, kansang tulo ka sunod-sunod nga daog naputol. (BANAT NEWS)