Alab Pilipinas mipilde sa Gilas Pilipinas sa exhibition game
CEBU, Philippines — Wala damha nga modaog ang Alab Pilipinas batok sa Gilas Pilipinas, 81-76 sa sangka tali sa duha ka team sa nasudnong Pilipinhon atol sa tune-up game kagahapon didto sa Meralco gym.
Ang Alab nga morepresentar sa umaabot nga ASEAN Basketball League gipangulohan ni Reggie Okosa nga miiskor og 21 puntos, gisundan nilang Lawrence Domingo ug Paolo Javelona nga mitikdol og 12 puntos matag usa.
Ang Alab mipilde sa Gilas bisan og wala miduwa ang reigning MVP nga si Ray Parks Jr. ug import niining si Ivan Johnson.
Sa habig sa Gilas nga nangandam alang sa FIBA World Cup qualifier, si Jayson Castro maoy misalida aron moposa og 12 puntos ug ingon man pangulohan ang koponan, samtang ang reigning PBA MVP nga si JuneMar Fajardo miamot og 10 puntos.
Miduwa usab alang sa Gilas mao sila si Gabe Norwood, Matthew Wright, Kiefer Ravena, Roger Pogoy, Troy Rosario, Carly Bryan Cruz, Raymond Almazan, Calvin Abueva, Allein Maliksi ug Kevin Alas.
Ang Alab anaa na karon sa hinapos nga bahin sa ilang preparasyon alang sa ilang ABL debut sunod Domingo batok sa defending league-champions Hong Kong Eastern Sports Club.
Sa laing bahin, ang Gilas nangandam sab alang sa ilang kampanya sa FIBA World Cup Qualifiers nga mosikad karong Nobiyembre 24 batok sa Japan. (BANAT NEWS)
- Latest
