Subzero Idols kampiyon sa 2017 IBP Caging

CEBU, Philippines - Sangko sa langit ang  kalipay nga gibati sa Subzero Idols human ilang gipilde  ang Dissenters,  69-64   aron masakmit ang korona sa  2017 Integrated Bar of the Philippines (IBP)-Cebu Basketball League niadtong Sabado didto sa Capitol Parish gym nga nahimutang sa dalan Escario, siyudad sa Sugbo.

Si Fermin Pepito  maoy labing kuyaw nga nakaduwa sa Subzero Idols ug gipangulohan ang kadaogan pinaagi sa iyang 32 puntos.

Gikan sa pagsugod wala gyud molubad ang duwa sa Booc Machine Shop ug kanunay silang  naglabaw hangtod sa katapusang gutlo.

Kuyaw sab kaayong nakaduwa silang Reman Manubag ug Marvin Miralles nga parehong mitikdol og 13 puntos  sa  Subzero Idols ni coach Bong Pepito nga milabaw og 10 puntos sa  halftime sa iskor nga 32-22.

Dili kaayo maayo  ang produksiyon sa ilang shooter nga si Lito Ortiz diin igo lang siya nakahimo og dos puntos tungod sa grabeng depensa ni Talisay Fiscal Jepoy Badilles nga igo lang sab miiskor og dos puntos.

Ang Dissenters  ni coach Jonas Asis misikit  ngadto sa dos puntos sa iskor nga 64-66 sa fourth period human masulod ang 3-pointer ni Vincent Deo Albeos, apan  mao ra kadto ang labing maayo  nilang  salida   kay  gipakgang ang ilang dautang tinguha  sa Subzero Idols.

Anugon lang kaayo ang 21 puntos ni Kern Sesante kay pakyas sila paglangkat sa giambisyon nilang titulo. Si Gemco Gabales miamot og 10 puntos ug walo ka rebounds sa naparot nga Dissenters.

Puntos matag usa

SUBZERO IDOLS (69) – F. Pepito 14, Manubag 13, Miralles 13, Malazarte 9, Capoy 4, Pepito 3, Marquez 3, Arrabis 2, Daluz 2, Ibañez 2, Macion 2, Ortiz 2.

DISSENTERS (64) –  Sesante 21, Gabales 10, Albeos 7, Sojor 5, Gamallo 4, Sarno 2, Badilles 2, Sususco 2, Rosal 2, Reyes 2, Fajardo 2, Sucalit 1, Asis 1, Reyes 1, Tumados 1, Puspus 1. (BANAT NEWS)