Solon midaog duha ka titulo sa FDR Visayas GP

CEBU, Philippines - Si Simon Spencer Solon sa FDR-Gudmoto maoy  labing daugan human niya maharos ang duha ka titulo sa FDR Visayas Grand Prix niadtong Domingo didto sa Hoopsdome sa Lapu-Lapu City,

Gidominar ni Solon ang elite ug intermediate automatic category. Iyang gipangpilde ang garbo sa Lapu-Lapu nga si Neil Perino ug ingon man si Zac Caneda sa CTR aron  paghari sa elite division .

Iya sab nga giangkon ang korona sa intermediate class batok nilang Ricky Jun Banson ug Silverster Ramirez.

Duna sab hinuo’y angayan nga ikalipay si Ramirez gumikan kay siya maoy nakampiyon sa novice underbone.  Ikatulo sab siya sa novice automatic nga giharian ni Ricky June Banzon.

Wala sab magpabitin sila Garry Caneda Jr. nga maoy mibira sa titulo sa elite underbone ug si John Paul Lantape  sa  intermediate underbone.  Si Justin Mallari sa SMDI-SpecV maoy midaog sa beginners underbone, samtang ang iyang igsuon nga si Chloe maoy gibayaw nga hara sa ladies underbone.

Lain pang mga mananaog mao sila si Jen Yoseres (Honda one-make race), Jareve Yee (85 kgs. weight class) ug Rafael Aquino sa CRT (special category). (BANAT NEWS)