7th JJ Surplus Ballclub Tourney padayong gihikay
CEBU, Philippines - Padayon pa gihapon nga gihikay sa mga organizers pinangulohan ni league commissioner Fury Trazona alang sa ilang pagpahigayon sa 7th JJ Surplus Ballclub basketball tournament nga gikatakda karong Enero 28 didto sa GT School gym sa Barangay Tayud, Lilo-an.
Matud pa ni Fury nga 12 ka koponan ang ilang gilauman nga mosalmot. Hinuon, wala pa niya gibutyag ang mga ngan sa teams nga mopakita’g aksiyon.
Sukwahi sa miaging tuig, estriktuhon na niya karon ang pagpadagan sa liga. Iyang hashasan og maayo kun kinsa ang angayan nga moduwa sa torneyo.
Ang liga mosubay og single round robin format sa eliminasyon diin ang top 2 teams awtomatik nga moabante sa semifinals.
Ang no. 3 ug no. 4 moagi pa sa quarterfinals. Ang no. 3 moharong sa no. 6 ug ang no. 4 makigbatok sa no. 5 diin ang mga mananaog maoy mokompleto sa semifinal cast.
Ubos sa pagtugot sa ilang presidente nga si Henry Agbon, kinsa mao sab ang tag-iya sa J/J Surplus, ang liga pagadumalaon ni commissioner Fury Trazona ug technical committee Chang Tejero. (BANAT NEWS)
- Latest