Magis Eagles kampiyon sa 1st International Friendship Games

CEBU, Philippines - Ang Sacred Heart School-Ateneo de Cebu Magis Eagles milampornas sa Colegio de Sta. Ana-Victorias Titans, 76-60, aron pagsakmit sa kampiyonato sa  1st San Remigio Properties-Magis Eagles International Friendship Games kagahapon didto sa Magis Eagles Arena sa SHS-Ateneo sa Canduman, Mandaue City.

Si Jeremy Nacua mitali og 15 puntos pulos gikan sa 3-point area diin ang tulo niini iyang gibomba sa mainit nga third-quarter rally nga maoy nakabugha sa Titans.

Midugang og 12 puntos si Eric Tuadles samtang sila si Errol Pastor, Renzo Calumpang  ug Andrei Benedict Chua mipuntos og 10 matag usa alang sa Magis Eagles, nga wala na molingi pa human giablihan ang duwa pinaagi sa 8-1 run.

Human gisirad-an ang first half bitbit ang 18 puntos nga labaw, 38-20, misamot pa og kainit ang Magis Eagles dayon na ngadto sa pagpaburot sa ilang labaw ngadto sa 25 puntos, 76-51, sa nahibiling tres minutos sa duwa.

"I'm proud of my boys because they are willing to learn," matud pa ni Magis Eagles coach Rommel Rasmo. "I just told them to be humble always and keep on working hard because we have achieve nothing yet."

Mitambong aron pagtunol sa tropeyo ug medalya ngadto sa mga mananaog mao si SHS-Ateneo President Fr. Manny Uy, SJ  Mark Anthony Ynoc, ang general manager sa San Remigio Properties nga maoy nagpaluyo sa maong upat ka adlaw nga torneyo nga gisalmotan og mga teams gikan sa Taiwan ug Manila.

"I'm planning to make this a yearly event. Hopefully we could attract more teams next year," dason pa ni Ynoc, nga usa ka Sacred Heart alumnus gikan sa batch 2002. — EBV (FREEMAN)