PBA cagers magsagubang lisud nga hagit batok sa Cebu, Davao teams
CEBU, Philippines - Ang Barangay Ginebra Gin Kings, Barako Bull Energy Cola ug Meralco Bolts sa PBA seguradong magsagubang og malisud nga hagit batok sa lig-ong regional teams gikan sa Cebu ug Davao sa gikahinaman nga Cebu-Leyte Cup, usa ka charity basketball event alang sa mga biktima sa bagyong “Yolanda” nga gikatakda karong Septiyembre 24-28.
Sa walay pagduda, ang Ginebra, Barako Bull ug Meralco maoy mga inilog, apan dili sila angayan nga mokompiyansa batok sa Team Samsam Gullas- Panalay Tailoring ug Goldstar Hardware-Davao gumikan kay pulos kini adunay kapasidad nga mopakugang kanila sa Cebu leg sa maong lima ka adlaw nga torneyo nga duwaon sa Minglanilla Sports Complex karong Septiyembre 27 ug sa Mandaue City Cultural and Sports Complex sa Septiyembre 28.
Ang Team Samsam Gullas-Panalay Tailoring ni coach Bong Pineda moparada og lima ka langyaw’ng imports nga silang Ramsey Williams, Christian Sentheu, Steve Cedrick Akomo, Jean Jacques Manga ug Emmanuel Ojuola. Moduwa uban kanila mao sila si Ferdinand Lusdoc, Harold Cincoflores, Jovanie Aguilar, Patrick Cabahug, Reed Friar Juntilla, Jayford Rodriguez, ug Ronaldo Bucao, pulos kanhi collegiate stars nga misalida sab og maayo sa commercial circuit.
Dili sab magpa-alkansi ang Goldstar Hardware-Davao, ang kampiyon sa 2014 Kadayawan Invitational Cup gumikan kay duna sab kini duha ka imports nga sila si Devon Sullivan, nga miduwa sa Thailand sa miaging Asian Basketball League ug si kanhi UV Lancer Mike Harry Nzeusseu. Ilang ikauban ang talentado sab nga mga local players nga gipangulohan ni Arjun Cordero sa Lyceum University.
Seguradong usa ka dakung gubat ang ilang sagubangon batok sa mga PBA teams.
Ang mga tiket nagkantidad og P150 (upper box), P250 (stage), ug P500 (ring side) sa mga duwa sa Minglanilla ug P200 (upper box), P400 (stage), P500 (lower box) ug P700 (ring side) sa Mandaue finals. Mapalit ang mga tiket sa New Reroma Pharmacy sa Poblacion Ward 1, Minglanilla, Bigstart Travel assistance sa Robinsons-Talisay, Cebu Coliseum ug sa The Old Spaghetti House sa SM City-Cebu. Alang sa dugang impormasyon, mahimong motawag sa 0932-6448871, 0923-7482110, 0922-5183771, 0917-6888890, 0998-3985159 o 422-8988.
Si Van Halen Parmis, nga maoy nag-organisar sa torneyo uban ni Fr. Joselito Catubig sa St. Bernard Parish, nagkanayon nga sa dili pa ang kumbati sa Cebu, ang lima ka adlaw nga kalihukan mosikad didto sa Baybay City, Leyte diin ang Goldstar-Davao makigharong sa Samsam Gullas-Panalay Tailoring sa usa ka charity exhibition match sa alas 6:00 sa gabii sa Septiyembre 24 didto sa Baybay gym. Mosamot pa og kainit ang aksiyon karong Septiyembre 25-26 didto sa lungsod sa Hinundayan, Southern Leyte diin ang Ginebra ug Barako Bull makigtigi batok sa Goldstar Davao ug Samsam Gullas-Panalay Tailoring. (BANAT NEWS)
- Latest
