Knicks no. 8 na sa East
CEBU, Philippines - Mikatkat na ngadto sa ikawalong puwesto ang New York Knicks human ilang gilubong ang silingan nilang Brooklyn Nets, 110-81 sa nagpadayong NBA regular season kagahapon didto sa Barclays Center sa New York City.
Gumikan niini, ang Knicks nagkaduol na sa ilang tinguha nga moabante sa playoffs ilabi na kay ang ilang higpit nga karibal sa ikawalong pwesto nga Atlanta Hawks napilde ngadto sa Chicago Bulls, 92-105.
Si J.R. Smith miposa'g 24 puntos, walo ka rebounds ug unom ka assists alang sa Knicks. Mihimo sab og double-double si Carmelo Anthony pinaagi sa iyang 23 puntos ug 10 ka rebounds.
Ang Knicks na karon maoy labaw sa percentage batok sa Hawks alang sa ikawalo ug kataposang luna sa playoffs sa Eastern Conference.
Si Tim Hardaway Jr. midugang og 17 puntos alang sa Knicks, kinsa midaog na og 12 sa miaging 15 nila ka duwa. Nangu sa pilderong Nets mao si Joe Johnson, kinsa mikubit og 16 puntos. Pormal na hinuon nga miabante sa playoffs ang Nets atol sa ilang pagpilde sa Houston Rockets sa miaging adlaw.
Naglabaw unta ang Nets, 20-19 sa uwahing bahin sa first quarter, apan mi-rally ang Knicks sa kombinasyon nilang Anthony, Smith ug Hardaway nga miiskor og 10 ka sunod-sunod nga puntos alang sa ilang 29-20 nga abante.
Ang triple ni Hardaway ug ang basket ni Iman Shumpert maoy naghatag sa Knicks og 14 puntos nga labaw, 34-20 ug nainat pa kini ngadto sa 63-38 sa halftime.
Miburot pa gyud ang labaw sa Knicks ngadto sa 82-61 sa fourth period sa wala pa maangkon ang kadaugan. (BANAT PALARO)
- Latest
