EDITORYAL — Manubag sa Konstitusyon

Kagahapon gisugdan na sa Senado isip impeachment court ang ilang pasiunang aksyon bahin sa mga kasong giatubang ni Bise Presidente Sara Duterte.

Gipresentar sa isi’g ka habig, prosekusyon ug depensa, ang ilang mga opening statements sama sa pagpahinumdom sa tanan kun unsa ka mahinungdanon ang maong proseso.

Parehong nakapresentar og mga puntos ug pamahayag ang duha ka kampo.

Ang kampo sa bise presidente mipasabot sa kung unsa ka importante ang patas nga pagdungog sa iyang kaso, ug mipahinumdom sa tanan nga 32 milyones ka boto ang nakuha sa bise para mabutang siya sa maong posisyon.

Tinuod gyud nga milyon-milyon ang nibotar sa bise nga niabot og 32,208,417. Pero si Presidente Ferdinand Marcos Jr. nakakuha sab og 31,629,783. Deperensya ra sila og 578,634 ka botos.

Natural lang ni kay ang duha magka-tandem sa miaging piniliay sa ilang nabuak nga UniTeam.

Mao nga buot ipasabot dili makapangangkon ang bisan kinsa nilang duha nga mas nakalabaw sila sa usa’g-usa.

Ang prosekusyon mipresentar sab sa ilang opening statement bahin sa importansiya sa maong pagdungog subay sa Konstitusyon ug sa kasamtangang mga balaod.

Walay si bisan kinsa nga opisyal sa gobiyerno nga molabaw pa sa Konstitusyon, kun ang mga ordinaryong Filipino gani papanubagon gani sa ilang salaod, mao sab ni ang dapat buhaton bisan sa mga tag-as nga opisyal bisan kinsa pa siya, matud pa sa prosekusyon.

Kay kung dili kini maoy matuman, unsa pay bili sa Konstitusyon? Kinahanglan lang gyud mao ang patas nga pagdungog, pagpresentar sa mga ebidensiya, mga testigos ug ang kung unsay gisulti sa Konstitusyon ug sa mga balaod bahin anang tanan.

Para sab malikayan ang kagubot, mas maayong tutokan sa publiko ang impeachment hearing, bahala pa og sa ilang tan-aw dili makiangayon sa ilang gituohang maoy sakto.

Hatagan nato og higayon ug saligan ang mga Senator Judges paghimo sa ilang trabaho ug likayan ang pagtuo-tuo ug dili magpadala sa hulhog sa kung unsa ilang makita sa social media kung dili gikan sa lehitimong source ang mga impormasyon aron walay kagubot.