Timaan sa pagbudhi
Sukwahi sa pasalig ni outgoing Governor Gwen Garcia nga wala basola ang iyang mga alyado sa kadaugan ni Governor-elect Pam Baricuatro, kay kumbinsido siyang gimaniobra ang automated counting machines (ACMs) sa eleksiyon niadtong Mayo 12, among nahibaw-an nga nagpadayon ang imbestigasyon pag-ila sa mga nagbudhi niya.
Samtang diplomatikanhon ang sinultihan ni Garcia sa publiko, daghang mayor ang gisabonan na og kasaba ug pamuyboy tungod sa iyang pagkalubong sa ilang mga teritoryo. Gani, duna nay mayor nga gikatahong nasakpan nga nagpakatap og sample ballots nga wala maglakip ni Garcia dayong eleksiyon.
* * *
Usa sa gipasikaran sa pagduda ni Garcia nga gibuko-buko sa iyang mga sakop mao ang ilang kahilom sa election protest nga iyang gipasaka sa Commission on Elections (Comelec) batok ni Baricuatro. Walay bisan usa ka kongresista, mayor, board member o kapitan nga nidason sa pasangil nga gitikasan siya sa ACMs.
Lahi sa naandan nga pagbaha dayon sa ilang suporta, apil nang mga pasidungog sa iyang pagpabilin sa puwesto bisan sa preventive suspension order sa Ombudsman, nikalit sila og kahilom sa pangangkon nga nakahipos og technical and software proven evidence.
* * *
Gipa-imbestigar sab ni Garcia ang pag-boykot sa mayoriya sa mga sakop sa Cebu Provincial Board sa special session nga iyang gipatawag sa niaging buwan aron pagpasar sa P1.2 bilyones nga supplemental budget nga gituohang gitumong aron makapatuman og mga proyekto si Vice Governor-elect Glenn Soco bisan mopuli na si Baricuatro sa Kapitolyo.
Gipaninglan ang board members nga nitambong sa tigom pag-plantsa sa budget hangtod sa alas-2 sa kadlawon niadtong Mayo 21 pero wala pakita sa sesyon.
* * *
Gipasusi ni Garcia unsa ka-balido ang mga rason sa mga mayor nga absent sa iyang gipatawag nga tigom sa Kapitolyo niadtong Hunyo 3. Dunay nipasangil nga nangasakit, nangangkon nga dunay biyahe, kasagaran nibalibad tungod sa prior commitments.
Mangahas mi og sugyot ni Garcia nga ang mosunod maoy mga timaan nga gitalikdan na sa iyang mga lider: Kon moapil sa tapok nga “Salamat Sugbo” duol sa Kapitolyo karong Hunyo29, magpanon sa pag-amen ni Baricuatro, kon ilang mga paryente o mga sakop magpatudlo og importanteng mga puwesto, o kon mosangyaw sa panginahanglan sa pagtabang sa bag-ong administrasyon.
* * *
- Latest
