Duha ka HVI nangadakpan

CEBU, Philippines — Nadakpan sa kapulisan Inayawan Police Station 7 sa Cebu City Police Office (CCPO) ang High value ug street level individuals nga nadakpan sa buy-bust operation sa Sitio Villa Zacate, Barangay Basak Pardo, siyudad sa Sugbo pasado alas 3 sa kaadlawon kagahapon, Sabado, Abril 20.

Nadakpan sa buy-bust operation si Juan Renjie Sismar Turado, 36, residente sa Barangay Basak Pardo, usa ka High Value Individual ug maoy subject sa buy-bust operation.

Nasikop sab sa kapulisan si Jeiger Gines Jaca, 43, residente sa Barangay Inayawan ug usa ka Street Level Individual.

Nakuha sa kapulisan sa Inayawan Police Station pinangulohan ni Major Jiceree Basitao gikan sa mga dinakpan ang 25.20 grams sa gituohang shabu nga nagkantidad og P171,360.

Nasayran nga si Turado nga maoy subject sa buy-bust operation usa ka newly identified drug personality samtang si Jaca nadakpan na kaniadto tungod sa ilegal nga drugas.

Samtang nasakmit sa Mandaue City  Police Office (MCPO) ang 300 gramo nga shabu nga nagkantidad og P2,040,000.00 gikan sa usa sab ka HVI nga inahan sa upat ka mga anak nga nadakpan sa buy bust operation sa Barangay Subangdaku, Siyudad sa Mandaue sa miaging Biyernes gabii Abril 19, 2024

Si Police Lieutenant  Colonel   Wilfredo, pangulo  sa City Intelligence Unit (CIU) maoy  nangulo sa buy bust operation nga miresulta sa pagkasikop  sa 37  anyos nga ginang nga taga Sitio Puntod sa Barangay Mambaling sa Siyudad sa Sugbo.

Ang suspek nangangkon nga gisugo lang siya paghatud sa maong ilegal nga drugas bugti sa suhol nga P5 mil.

Miangkon sab kini na naa sa prisohan ang iyang bana karon tungod gihapon sa kaso sa ilegal nga drugas.

Mag-atubang og kasong kalapasan sa Section 5 ug 11, Article II sa Republic Act 9165 ang mga suspetsado.-- Romeo Limpangog, IBM BANAT NEWS