Pagpanghilabot batok pagpanggilabot

Bag-o lang natapos ang Semana Santa. Mga adlaw sa pamalandong, pagpuasa ug pagpakig-uli sa atong gibiyaang Ginoo. Ug gigahinan ba nato Siyag igong panahon sulod sa simbahan, sinagoga o altar-alampoanan aron dawaton-gakson ta Niya pag-usab?

Pagka buntag sa miaging Biyernes Santo, nakurat ko. Kay paghitangka nako sa among kan-anan, maoy nadungog ang pang-beerhouse nga tuno gikan sa nag-sing-along namong silingan.

Gitawagan ko ang guwardiya sa subdibisiyon aron sa hinigalang paagi, badlongon ang nahisgotang nagkantakanta ug pahinumdoman nga Biyernes Santo intawong dako. Pastilan, giluratluratan man nuon ko ni misis, uy! Ngano kunong nanghilabot ko sa among silingan?

Aw, ako siyang gipasabot. Nga ang akong gihimo dili usa ka pagpanghilabot. Kondili, usa ka pagpanggilabot. Kay alang nako, ang ‘pagpanghilabot’ usa ka negatibong aksiyon nga makadaot ug usa ka pagpangdaot sa isi'g ka ingon nga mahipunta na hinuon sa panag-away. Busa, very destructive!

Samtang ang pagpanggilabot usa ka positibong aksiyon nga magpahinumdom sa hingtungdang tawo, nga wala na mahisubay sa balaod sa Diyos ang iyang gibuhat ug delikado nga mahitumpawak hinuon siya sa kadaotan. Sa laktod, ang pagpanggilabot makatabang, mopatul-id ug moprotehir. Busa, very constructive.

Mao baya kini ang nawala sagad sa atong kaigsuonan – ang pagpanggilabot. Bisag aduna nay nakit-ang sayop sa silingan nga makaisturbo sa uban, tungod sa kahadlok nga makontrahan, mawad-ag higala, pasagdan na lang. Resulta, nanaghan hinuon ang maong sayop. Na’an, kinsay angay basolon? Dili ba ikaw ra usab nga wala magpakabana ug manggilabot? Dapat, ang pagpangilabot magsugod sa atong panimalay.

Tan-awa ra god unsay nahitabo sa atong Senado ug Kongreso? Sila maoy tigbuhat og mga balaod. Suheto sila sa balaod.  Pero makahibulong? Ang mga Kongresista nga giharian ni Speaker Martin Romualdez, imbes manggilabot sa tiyabaw sa katawhan, kinsa wala na mosalig sa ipahimong balaod ni Martin, nagpakabuta-bungol lamang ug mipasiatab pa, nga daghan na kuno kaayong mipirmang Pinoy pabor sa gipasiugdahan nilang People’s Initiative. Apan sa kasaligang latest Pulse Asia Survey (PAS), migawas nga 88% sa mga legal citizens ang misupak!

Saludo ko sa PAS. Tungod kay sa ilang pagpanggilabot isip kabahin sa sosiyedad, milutaw ang matuod nga sentimento sa nagpakabanang katawhan. Karon, kinsa bay angay tuohan: Kongreso o PAS? Bawal, vote-buying, ha?